Kohima, K’lyngkot 21 :Ha kawei pat ka jingkylla ha ki kam sain hima sima, hynriew ngut ki dkhot jong ka BJP ha Nagaland ki la iehnoh kam ha ka 20 tarik mynta u bnai da kaba pynpaw halor ka jingiapher jingmut kaba don hapoh.
Katba ka jylla ka dang pynkhreh na ka bynta ka ilekshon assembly ka ban wan, ki nongialam bad ki dkhot na ki party sain hima bapher bapher ki la sdang ban ia ryngkoh diengkper.Ha ka jingjia ba dang shen hynriew ngut ki dkhot na ka ktem BJP ha Nagaland ki la iehnoh kam ha ka 20 tarik mynta u bnai.
Haba phah ia ki shithi iehnoh kam, kine ki hynriew ngut ki dkhot ba la rim jong ka BJP ha Nagaland ki la ong ba ka la don ka jingkylla kaba khraw ha kaba iadei bad ki nongialam ha kaba iadei bad ki nongmihkhmat napoh 37 Tyui A/C sha ka Nagaland Legislative Assembly.
Ki nongthep vote jong ka 37 Tyui A/C ki la shim ba ka jingmihkhmat kaba 15 snem da uwei u briew ka long kaba la biang halor ka jinglah ka jong u, bad kumta mynta ka donkam ia ka jingkylla.
Ki hynriew ngut ki dkhot ka BJP kiba la iehnoh kam ki kynthup ia u P. Renbenthung Lotha, President ka BJP 37 Tyui, A/C Mandal, Nzunyimo Ngullie, Vice President, BJP 37 Tyui A/C Mandal, Zulamo Ngullie, Secretary, BJP 37 Tyui A/C Mandal, Thungbeni Ezung, Executive Member, BJP 37 Tyui A/C Mandal bad u Nzamo Ngullie, Executive Member, BJP 37 Tyui A/C Mandal.
Lah ban kdew hangne ba baroh kitei ki dkhot kiba la iehnoh kam na ka BJP ki dei na ka constituency jong u Y Patton uba dei u Symbud Myntri Rangbah ka Nagaland.
Ka jingpynlong ia ka jingiathep vote na ka bynta ka ilekshon assembly ha Nagaland kan long ha ka 27 tarik u Rymphang 2023, bad ka jingniew ia ki vote kan long ha ka 2 tarik u Lber 2023.Ia kane la pynbna da ka Election Commission of India ha ka sngi Balang ba la lah.
