Pyllait paidbah ia ka Documentary Film “1978 KSU Shirta”
Shillong, Lber 20: U President ka Khasi Students Union u samla Lambokstarwell Marngar hynne ka sngi ula ong, ka seng kan iai bteng ban shakri iaka ri bad jaidbynriew bad kan pynbeit bad wohkjat iaka sorkar lada ka leh bakla.
“Ka KSU kan iai long ka nongpynbeit lada ka sorkar ka bakla, ka KSU kan long ka nongwoh kjat iaka sorkar lada ka leh iaka bym dei bad ka KSU kan long ka kynhun kaban tied da u tyrnem iaka jingkhang jongka Secretariat lada ka sorkar ka rai bakla ia ki ishu jong ka jaidbynriew. Ka KSU kam long halor, hynrei ka don iaka jingkitkhlieh bad jingkit ram naka bynta ka ri bad ka jaidbynriew baroh kawei” ong u Lambokstarwell Marngar haba ai jingkren haka jingrakhe iaka lyngkhuh jingdap 45 snem jong ka KSU kaba la long hynne ka sngi ha Soso Tham Auditorium.
Kum ka dak ban pynsahkynmaw ia ki lynti iaid jong ka jingshakri ka KSU ia ka ri bad jaidbynriew, ki nongialam barim ka KSU kiba kynthup ia u Bah Micheal Syiem bad u Bah Geffrey Basan kila pyllait paidbah iaka Documentary Film kaba la ai kyrteng “1978 KSU SHIRTA”.
U samla Lambokstar ula ong, bun kila iakren iakhana bad buh ruh iaka jingkylli, balei ka KSU kam mih ha ki rynsan saiñ pyrthei, hynrei ula ong, “Ka KSU kam ju mih tang shisien ha ka san snem, ka KSU ka mih shirta ka jingim naka bynta ban shakri hok ia ka ri bad ka jaidbynriew. Ngi la mih madan na ka por sha ka por, ngim donkam ban put turoi ne ban kyrsum ktieh, hynrei ngi shah kynthoh bad shah kren beiñ na ka bynta ka dawbah jong ka ri bad ka jaidbynriew”.
U Samla Lambokstarwell ula ong, ka sorkar India kala pyrshang ban tih ia u Uranium uba don ha ka jylla bad ka sorkar ka thmu ruh ban wanrah iaka lynti rel.
“Lada ka sorkar ka thmu ban tih ia u Uranium kadei ban khlong shwa ia u klongsnam u jong nga bad u jong phi bad khamtam ia ki dkhot jong ka jaidbynriew bad lada ka sorkar ka thmu ban wanrah iaka lynti rel, kadei ban pynurlong shwa ia ki aiñ ki kanun kiba ngi la dawa. Lada ka sorkar ka leh pyrshah, ngim banse ban thom ia ka sang bad kaei kaba la jia ha u snem 2017 kan kham shyrkhei shuh shuh lada ka sorkar ka leh kuman bad leh pyrshah iaka rai jong ki khun ka bri u hynniewtrep” ong u President ka KSU.
Une u Nongialam ka KSU ula kyntu ia ki samla ba kidei ban mih shakhmat bad ban bteng ban ai jingshakri iaka jaidbynriew da ka jingtipbriew tipblei bad dei ban long pat kiba husiar namar ki don kiba ap thap ban ialeh ban pynsniew iaka KSU bad ia ki nongialam ki jongka ha ki bynta bapher bapher.
Ha kane ka jingrakhe dap 45 snem ka KSU naduh bala seng ha ka 20 tarik u Lber 1978, la wan ban iadonlang ki nongialam kiba la donkti ha kaban seng ia ka KSU, ki nongialam kiba rim bad kiba mynta, ki Myntri ka sorkar jylla, ki MLA, ki nongialam sengbhalang bad kiwei kiwei.
