Shillong, K’lyngkot 20 : Ka Jylla Meghalaya hynne ka sngi Saitjain kala rakhe ia ka lyngkhuh ba 52 snem ka jingioh Jylla ba pura ha ka jingialang ba long ha District Auditorium & Library, Tura.
Ia kane ka jingrakhe la pynshongkun da u Lat ka Jylla Phagu Chauhan kum u Kongsan bad u Myntri Rangbah ka Jylla Conrad K Sangma kum u symbud kongsan.
Haba ai jingkren, u Myntri Rangbah ula ong “Nga kwah ban kynmaw bad ai burom ia ki Nongialam jong ngi kiba la iakhun ban ioh iala ka jong ka Jylla da ka lynti kaba jai jai bad ngi kum ki Nongshongshnong ngi la ioh ia ka jinglaitluid mynta namar ka jingiohi jngai bad len lade bad ngi dei ban btin lynti ia ka Jylla ba kan iaid shakhmat”.
U Myntri Rangbah haba kren halor ka roi ka par jong ka Jylla ula ong ba ka jingpynlut jong ka Jylla kala long arshah ha kine ki san snem kaba la wanrah ia ki jingkylla ha kiba bun ki liang kum ki surok, ka koit ka khiah, ka pule dangle, ki kam ialehkai bad ki kam bhalang ki samla nalor kiwei kiwei.
“Ha u snem shuwa u 2018, ka jingshna iaka surok PMGSY ka long 1695 km hynrei naduh 2018 haduh mynta, ngi la shna ia jan 2526 km ka surok PMGSY kaba pyniasoh ia 600 tylli ki Shnong haba nujor bad kaba mynshuwa ba 70” ula ong.
Ula pyntip ruh ba ka Sorkar kala mang ia ka song pisa ban shna pynbha ia baroh ki Ophis jong ki Block bad ruh ia 2500 tylli ki skul Sorkar ba kin ioh ia ki jingtei ba thymmai lane ban pynbha pat.
U Conrad ula kren ruh halor ka jingpynleit jingmut ba kyrpang sha ki nongrep, ki kynthei bad ki samla jong ka Jylla la ka dei ha ka dur jong ki Self Help Group (SHG), ka put ka rem, ka sengkam sengkam bad ka kam ialehkai.
Haba kren halor ka Meghalaya Games, u Conrad ula ong ba lai na ki san tylli ki Meghalaya Games la pynlong hadien u 2018. Ula kular ba ka Meghalaya Games kan long noh ka lympung ialehkai ba manla u snem ka ban long da ki pali ha ki thain bapher bapher bad yn tei ruh ia ki jingtei ba donkam ha ki District bapher bapher.
Haba kut, u Conrad ula ai khublei ia baroh ki nongjop jong ka khusnam Meghalaya Day bad ai khublei ia ki nongioh halor ka jingsynniang sha ka bha ka miat jong ka Jylla lyngba ka jingshakri jong ki.
Ka jingialang ba heh duh ka dei ka jingpyllait ia ka Meghalaya State Anthem bad ka State Logo ia kaba u Myntri Rangbah ula ong “ka dei ka jingsarong ba ka Kynhun Myntri kala mynjur ia ka State Anthem hadien 52 snem ka jingioh Jylla lajong”.
Haduh 15 ngut ki nongtrei kila ioh ia ka khusnam Chief Minister Police Medal for Outstanding Service, 6 ngut ia ka Chief Minister’s Disaster Response Medal bad 21 ngut ia ka Meghalaya Day Excellence Awards 2023 ha kane ka sngi.
Kiba la iadonlang ha kane ka jingialang ki kynthup ia ka Myntri Sorkar Kong Ampareen Lyngdoh, u Chief Secretary Bah DP Wahlang bad kiwei kiwei ki Heh Ophisar.
