Shillong, Jylliew 24 : Ka West Jaiñtia Hills District Police ryngkat ka jingiatrei lang bad ka Seiñ Kynjei hynne ka sngi ka la rakhe ia ka Nasha Se Azadi Pakhwada ha ka jingialang kaba long ha Panaliar Community Hall, Jowai.
Katei ka jingrakhe ka long kum shi bynta jong ka International Day against drugs abuse and illicit Trafficking kaba la ju rakhke man la u snem ha ka 26tarik u Jylliew ban ialap bad pynshai paidbah halor ka jingiakhun pyrshah ia u drok.
Nalor u Kongsan u Dr. L. R Bishnoi, IPS, DGP, Meghalaya Shillong, ha kane ka sngi la donlang ruh naduh u BD. Marak, Superintendent of Police, West Jaiñtia Hills, nangta u B Chhetri, ASP, Kong C W Lyngdoh, DSP, Dr. A Paswet, Psychiatrist, ki dkhot jong ka Seiñ Kynjei bad palat 700 ngut ki khynnah skul.
Haba kren ha ka jingialang, u DGP u la pynshai bniah bha halor ka jingktah bad ka jingsniew kiba mih na ka jing kynrei u drok bad kumta u la kyntu ia ki samla ba kidei ban kiar lailum laiwah na u drok.
Da kaba ban jur ba donkam kyrkieh ban iakhun ia ka jingsniew jong u drok, u DGP u la pan ruh ka jingiatreilang jong baroh na ka bynta ban lah pynduh jait ia une u nongshun jong u nongshong shnong. U la pyntip ruh ba ka tnad Pulit ka la sdang ruh ban leit pynshai kylleng kylleng khamtam ia ki samla haba iadei bad ki jingsniew bad ki jingktah kiba mih na utei u kynja jingdih.
La iathuh ruh ba ka tnad pulit tang ha ki shibnai tam ka la dep, kala lah ban pynlong haduh kumba 250 tylli ei ei ki jingpynshai paidbah da ka jingkyrmen ba kin sa lah ban pynshai bad pynsngewthuh ia ki samla kumno ban lait na u drok.
Hadien kane, u BD Marak, SP ka distrik u la ia syllok ruh bad ki khynnah skul haba iadei bad katei ka phang.
