Shillong, Jylliew 24 : U Chief Executive Member ka KHADC, u Bah Titosstarwell Chyne u la ong ba ka jingbthah jong ka Sorkar Jylla ban weng noh ia baroh ki khyrdop lum khajna na shi lynter ka surok bah kan sa ktah jur ia ka jinglum khajna jong ka Council ha ki snem ban dang wan.
U CEM ula ong, “Namar kane, ka KHADC kan sa pyrshang ban wad noh ia ki lad ki lynti kumno ban lah leh eiei halor kane ka kam”
Lah ban kdew hangne ba ha ka sngi Palei, ha ka jingialang hapdeng ka Sorkar Jylla bad ki nongialam jong ki District Council, ka sorkar kala bthah ia ki District Council ban phah khang khyrdep lut ia baroh ki khyrdop lum khajna kiba don ha shi lynter ka surok National Highway.
“Na ka liang ka District Council ngi la tip ba ka long beain ban pynieng ia ki khyrdop ha shi lynter ka National Highway hynrei namar kadei kaba la ju leh naduh ki snem ba ladep, kumta kitei ki khyrdop ki dang bteng haduh mynta. Ngim kwah ba kan mih kano kano ka jingsngewpher bad kumta ngi la rai ba ngin ym pynieng shuh kino kino ki khyrdop tangba ngi la pynkhreh pat ban wad da kiwei ki lynti kumno ban leh,” la ong u CEM.
Haba pynpaw ba ki District Council, ki dei ka bor treikam kaba la pynkupbor da ka Khyrnit kaba Hynriew jong ka Riti Synshar jong ka Ri, u CEM ula ong “Ka Riti Synshar ka Ri kaba aibor ia ka Council ban lum khajna. Hynrei mynta ngi hap ban wad ia ki lad ki lynti kumno ban leh bad shen ngin sa pynbna paidbah ia ka rai jong ngi”.
