Shillong, Jylliew 24 : Ka Malki Sports Club ka la ioh ban khur ia ki lai point ha ka lympung iakhun jong ka Shillong Premier League kaba long ha ka janmiet sngi Thohdieng ha madan Third Ground, Polo hadien baka la lah ban pynliem noh ia ka Mawkhar da 2-0 ha ka jingiakhun jong ka kylla kaba ar hynne ka sngi.
Ia ki ar kol jong ka Malki ha kane ka sngi la ioh ban thep da u Donboklang Mawlong ha ka minit kaba 45 jong ka kylla step katba ia ka kol kaba ar jong ka kynhun pat la ioh ban thep da u Kordor Dkhar ha ka minit kaba 48 jong ka kylla miet.
Haba phai dien sha ka jingiakhun kaba dang shu dep shen ha ka kylla kaba nyngkong, ka Malki ka la shah rem haduh 3-0 kol ha ka Ryntih Sports Club katba ka Mawkhar pat ka la mad ia ka nam iakhaid kaba mar 1-1 kol ha ka jingiakhun pyrshah ia ka Rangdajied United FC.
Ha ka jingshisha, dei ka Mawkhar kaba ioh ban thep kol nyngkong ha ka minit kaba dang sdang jong ka kylla step lyngba u Aibanraplang Dohling tangba ym shym la khein kol na ka daw ka Offside. Hadien kane, tang kumba ar minit ei ei u Pynkhambor Suting u la ioh biang sa kawei ka kabu ksiar tangba kane ruh ka leit shabar kol. Kane ka la jia kumjuh ruh ia u Balajied Syiemlieh uba la pynlehnohei ia ka kabu ksiar ba ki ioh.
Na ka liang ka Malki ruh ka laioh bun ki kabu ban thep kol tangba kumba long ka Mawkhar kane ka kynhun ruh ka pynlehnohei bun bha ki kol.
Ka jingiakhun la shai ka sngi kan dei kaba kham shongshit namar ka dei para ba iakhlain bha, kata hapdeng ka Ryntih pyrshah ia ka Rangdajied United.
