Shillong Naitung 13: Ka All Meghalaya SSA Teachers Association (AMSSATA) hynne ka 13 tarik u Naitung kala pynbna ban pynlong ia ka jingiashong kyllain myngngor kaba khlem buh por kaban sdang naduh ka 15 tarik mynta u bnai halor ka jingpulom ka sorkar jylla ban pyllait iaka tulop kaba 5 bnai.
U General Secretary ka AMSSATA u Bah Defender S Lamare, haba iakren bad ki nongthoh khubor u la ong, ba hynne ka sngi kila leit ban aiti da ka dorkhas ha u Myntri Rangbah ka jylla kum ka jingpynkynmaw iaka dorkhas kaba kila dep ban aiti teng haka 5 tarik u Naitung 2022 ha kaba iadei bad ka jingsahteng ban siew iaka tulop kaba dang sah.
“Ha ka jingialang jong ka Executive Committee haka 5 tarik mynta u bnai, la shim ia ka rai ban sdang iaka jingiashong kyllain myngngor kaba khlem buh por naduh ka 15 tarik u Naitung halor ka jingpulom ka sorkar ban pyllait iaka tulop kaba dang sah” ong u Bah Lamare.
U Bah Lamare u la ong, naduh u snem 2016-2017, ki nonghikai SSA ha ka jylla kim shym la ioh iaka Arrears ha kine ki 8 bnai kiba la dep bad ki nonghikai SSA kila mad iaki jingeh kaba khraw naka jingbym ioh tulop mynta la 5 bnai lynter.
“Nalor ka jingbym ioh ia ka tulop kaba 5 bnai, ka sorkar kala niewbeiñ ia ki nonghikai SAA bad ngim shim la ioh iaka Arrear mynta la 8 bnai naduh u snem 2016-2017” la ong u nongialam ka AMSSATA.
U Bah Defender S Lamare u la pyntip ba ha katei ka jingiakhih kaban long ha nongbah Shillong, yn wan ruh ban iashimbyntalang da ki nonghikai hapoh ka lama jongka All Garo Hills SSA School Teachers Association (AGHSSATA).
