Shillong, Jymmang 03 : Ka Sorkar Jylla ka don jingthmu ban pyndait haduh 300 tylli ki camera bad ka software ba lah ban pynithuh durkhmat ia ki briew (facial recognition) ha kylleng ki jaka jong ka Nongbah Shillong, ka ban sa leh shen.
Ia kane la pyntip da u Myntri Rangbah ka Jylla Conrad K Sangma uba la ong ba ka jingpyndait ia kine ki camera kan iarap ha kaban tehlakam ia ki riew pynkhein ain.
Kane ka jingkren jong u kala mih ruh ha ka por ba ka Nongbah Shillong kala sakhi ia ka jingshah ther petrol bomb ki Nongkynti ka Sorkar kynthup ki Police Station.
Haba iakren bad ki nongthoh khubor hynne ka sngi Thohdieng, u Conrad ula pyntip ba ka Sorkar kala dep mang ia ka pisa ba T. 150 klur na ka Smart City Project ban buh ia ka Integrated Control and Command Centre (ICCC).
“Ki kam kila sdang bad ha manla ki lad phi lah ban iohi ia ki camera bala pyndait. Kin don kumba 300 tylli ki camera ban pyndait ha baroh kawei ka Sor bad kine kin nang khlain da ka jingdon lang ka software ban pynithuh ia ki durkhmat ki briew bad ka ICCC bad ka IT Park bala buh, ia kaba ngi la khmih lynti ban plie ha u bnai Naitung” ula ong.
Haba kylli, u Myntri Rangbah ula ong “Ngin lah ban ong ba kin ioh ring lut ia baroh hynrei kawei kaba thikna ba kan long ka jingtehlakam kaba khlain bad haba kine ki camera kila don ha kylleng ki jaka, kaba ngin sa nang pynbun katba nang iaid ka por, kan sa long ka atiar ban tehlakam namar baroh ki briew kin shah peit thuh lut ha ka iaid ka ieng”.
“Nga kular ba kane kan iarap ban pynduna ia kum kine ki jingjia (kawang petrol bomv) bad kiwei ki kam bymman hadien habud bad ha kajuh ka por kan iarap ia ka Sorkar bad khamtam eh ki Pulit ba kin lum sakhi” ula ong.
