Shillong, K’Lyngkot 21: Ka Sur Paidbah jong ki ar Dorbar Shnong ka Mawkynrew bad Mawlein, kila ieng skhem haka nongrim ba kin ym shah satia ban pyniaid shakhmat ia ka jingpyntrei iaka skul Ramakrishna Mission ha Mawkynrew.
Kane ka wan hadien ba ki paidbah kila kynnoh ba u Acting Sordar lem bad ki briew jong u, kila aiti sop sop iaka jaka ka kaba dei ha Madan Football Umjar sha ki bor pyniaid jong ka Ramakrishna Mission ban tei Iingskul.
Haka 20 tarik mynta u bnai, ka jingkulmar kaba shyrkhei kalajia ha Mawkynrew hadien ba ki paidbah kila ia pynibor markylliang bad ki Pulit ban leit thung nar kol ha Madan Umjar ba pynieng iaka skul Ramakrishna Mission.
Ha kane ka jingiakulmar, 12 ngut ki briew kynthup ki Pulit kila mynsaw.
Haba kren sha ki lad pathai khubor ha Shillong Press Club, u Sordar barim ka Mawlien Bah Phrangstarwell Wankhar u la ong ba ki paidbah ka Mawkynrew bad Mawlein kim pyrshah ban tei skul hynrei ki pyrshah ban tei ha Madan Umjar namar kane ka dei ka jaka jong ka Mawkynrew Sports Cub.
U la kynnoh ba Acting Sordar ba mynta u la iaid lait iaki paidbah bad iaki bor shnong jong ka Mawkynrew bad Mawlein daka ba ai jaka sop sop iaka Ramakrishna Mission ban tei iingskul.
“Ngi donkam baroh 2 tylli kata ka skul naka bynta ka jingmyntoi ka thaiñ bad haka juh ka por ngi donkam ruh ka jaka ialehkai (Madan Football) hynrei kane ka jingpyrshah ban tei iaka skul Ramakrishna Mission kadei namar ba ïa kane ka skul, la tei haka jaka ba la ai shaka Mawkynrew Sports Club” ong u Bah Phrangstarwell.
U la Kynnoh ba kane ka jaka ha Madan Football Umjar ka dei jong ka Raid ba kynthup ia ka Mawkynrew bad Mawlein.
“Kala don ka jingkyntur pud shaka Madan Umjar daka ba pyntrei iaka skul Ramakrishna Mission bad ïa ka jingbit la aiti hi da u Acting Sordar khlem da jingtip ki paidbah bad ki ar Dorbar Shnong” u la kynnoh.
U Bah Phrangstarwell u la kam ba ki don ki sakhi sabut ba ka jaka ba u Acting Sordar u ai sha ka Ramakrishna Mission kam dei haka Madan Umjar hynrei iaka Skul pat la tei marjan ka Madan kaba la pynlong ruh iaka jingkyntur pud haba tei iaka skul.
Haba iadei bad ka jingkulmar kaba la jia haka 20 tarik, u Sordar barim u la kynnoh ba ki jingkulmar ki mih namar ka jingleh donbor hi u Acting Sordar u ba mynta.
