Shillong, Risaw 09 : Ki PM POSHAN Cook-cum-Helper ha Meghalaya kila rai ban trei noh tang shisngi ha ka shitaiew ha u bnai Risaw bad Naiwieng, kum ka dak ka jingiakhih pyrshah ia ka jingrit palat ka honorarium bad ka jingshah niew kum ki nongtrei mon sngewbha (voluntary) ,.
Ia kane ka rai la pynbna da ka President ka Union of Cook-cum-Helper PM POSHAN Meghalaya kong Gina Nengnong ha ka jingialang ha Shillong, hynne ka sngi Thohdieng.
“La 20 snem ngi la trei ia kane ka kam, ngi la trei na ka bynta ka imlang sahlang lyngba ki khynnah skul. Ngi kyrpad ia u Myntri Rangbah Duh ban khmih lem sha ngi” ong ka kong Nengnong, haba pynpaw ba ki 20 snem ka jingai jingshakri kam shym la pynioh ia ka jingithuh.
Ka ong ba ki cook kila shakri da ka jingaiti lut. “Ngi niew ia ki khynnah skul kum ki khun lajong, ngi ai ia ka bam sha ki. Haduh mynta kam pat don kawei ruh ka skulk aba pyntip ba ki khynnah kiba bam ia ki ja sngi kiba iohpang, bad kane baroh ka dei namar ngi trei naduh ka mynsiem”.
Haba tynjuh pyrshah ia ka jingkhein kum ki nongtrei monsngewbha, kala ong “Kam iahap shuh ban khot ki nongtrei mon sngewbha. Lada ngi shitom, hato ki ailad ia ngi ban jah? Ngi hap ban leit man ka sngi. Lada ngi phah da kiwei, ngi hap ban siew nala ka jong ka pla”.
“Kane ka dei ka por ba ngi hap ieng na ka bynta ialade. Ngi kwah ia phi ban ithuh ia ngi kum ki cook, ban burom ia ngi lada phi sngew ba ngi dei ki rishot jong kane ka sheme” kala ong.
Ka kong Nengnong ka ong ba wat hadien bun tylli ki shithi, kam shym la don kano kano ka jubab da ka jingthoh na ka Sorkar Pdeng. Kum ka sienjam ba shipor, ki cook kin shet tang shisngi ha ka shitaiew bad iarap ban sam ia ki khaw ban lait ka sepei, haba leit trei ruh ia kiwei ki kam ban pynbiang ia ki jingdonkam ialade”.
