Shillong, Jylliew 13 : Ka Sorkar Jylla kala rai ban nang thung bniat shuh shuh ia ka ain Meghalaya Residents, Safety and Security Act (MRSSA), 2016, ka ban pynduna bad tehlakam ia ka jingwan rung ki riew bymman sha Meghalaya ha ka nam kum ki nongwan jngohkai.
Kane ka jingtyrwa ka long kongsan bha khamtam hadien ka jingshah pyniap uwei u nongwankai na Indore, Madhya Pradesh,Raja Raghuvanshi, uba la shah pyniap hala ka jong ka kurim ha ka jingwan honeymoon ha Sohra.
Haba kren sha ki lad pathai khubor hadien ka jingialang ka Kynhun Myntri, u Nongaiktien ka Sorkar MDA bad Myntri Bah Paul Lyngdoh ula ong “Ka kynhun Myntri kala rai ban shong bishar biang ia ka MRSSA kaba dei ka Ain ka Jylla bala don lypa bad ban nang thung bniat shuh shuh ia kane ka ain haba khmih ia kaei kaba ngi dang shu mad mad ia ka jingjiaha Sohra, khnang ba kan pynthikna ban ngin lah pynduna katba lah ia ka jingwanrung ki riew bymman sha Meghalaya ha ka nam kum ki nongwan jngohkai”.
Halor ka jingiakhih ban pyrshah ia ka jingpynslem ban pyntreikam ia ka Inner Line Permit (ILP) ha Meghalaya, u Bah Paul ula ong ba kane ka kam ka dang sahkut bad ka Ministry of Home Affairs (MHA).
“Haba iadei hi bad ka ILP, ai ba ngan pynkynmaw ia phi ba ka Iingdorbar Thaw Ain kala dep mynjur ia ka Resolution. Kane ka kam kala sahkut bad ka MHA, kaba la buh shibun ki jingkylli, kaba ngi kum ka Sorkar Jylla ngi dang pyrshang ban leh eiei. Katto katne ki jingkylli ki iadei bad ka jingshisha ba ka Meghalaya ka dei ka lynti iaid sha kiwei pat ki Jylla ka thain Shatei Lam Mihngi kum ka Silchar bad ki Jylla kum ka Mizoram bad Tripura” ula ong.
Haba kylli, u Bah Paul ula ong “Lada phi pule ia ka MRSSA, kila don lypa shibun kiei kiei hynrei ngi donkam ban nang pynkhlain bad nang pynjanai ia kaei kaba ngi la don lypa ha ka MRSSA”.
Kat kum ka jingong jong u, ka Sorkar kan sa wanrah shen ia ka jingtyrwa ban pynkhlain ia ka MRSSA.
, 2016, ka ban pynduna bad tehlakam ia ka jingwan rung ki riew bymman sha Meghalay ha ka nam kum ki nongwan jngohkai.){kind=link}