Shillong, Jylliew 13 : Ka Iingkashari Meghalaya High Court, kala bthah ia ka Sorkar Jylla bad ia ka Committee ba kin pynlong ia ka jingialang bad baroh ki Balang Khristan ha kaban pynbeit ia ka jingeh ba iadei bad ka jingtep ia ki briew ba iap ha ki lum jingtep.
Ha ka hukum bala pynmih hadien ba shong bishar ia ka PIL ha ka sngi Pale, ka Division Bench ba kynthup ia u Chief Justice IP Mukerji bad Justice W Diengdoh kala ong “Ngi ailad ia ka Sorkar bad ka Committee tad haduh ka sien shong bishar biang ia kane ka PIL ba kin lum ia ka jingialang jong baroh ki Balang Khristan bad ban shim ia ka rai ban pynbeit ia ki jingeh ban tep ia ki briew ba iap haki lum jingtei”.
“Ngi pynjlan ia kane ka PIL tad haduh ka 3 tari Naitung, 2025 ban pynlah ia ka Sorkar bad ia ka Committee ba kin ailand ia ka kaiphod lane ka kaiphod ba la la ka jong hapoh ka 1 tarik Naitung, 2025. Phah ia ka copy sha u Advocate-on-Record jong u nongmudui” kala bynrap.
Ka Iingkashari kala bthah ruh ia ki lai tylli ki District Council – Khasi Hills Autonomous District Council, Jaintia Hills Autonomous District Council bad ka Garo Hills Autonomous District Council ba kin iatreilang bad ka Sorkar Jylla lem bad ka Committee ban pyntreikam ia kane ka hukum.
Shuwa kane, ka Iingkashari kala pan ia ka kaiphod na ka Sorkar lad aka don ne em kano kano ka jingtyrwa ban nang pynbun ia ka jingdon ki lum jingtep na ka bynta ki riewngeit jong ki balang Khristan.
Nyngkong hi, ka jingthmu jong kane ka PIL ka dei ka ba la pynleit jingmut haba iadei bad ka jingpynsuk ia ka kam thang ia ki briew ba iap kiba dei na ki Jaidbynriew Khasi bad Jaintia bad ruh ia kito kiba ngeit Hindu, ha baroh awei ka Jylla.
Ka mat ba hakhmat eh ka dei namar ka jingduna ki jaka thang briew bad ka jingbym don mon jong kine ki ar Jaidbynriew ban iathang lang ha ka juh ka jaka thang ia ki briew ba iap.
