Shillong, Nailur 15 : Ka Sorkar Jylla kala rai ban jer kyrteng thymmai noh ia ki artylli ki kad Liengsuin ha ka kyrteng ki arngut ki Myntri Rangbah ka Jylla.
Haba pynbna ia kane ha ka jubab ia ka jingiatai, u Myntri Rangbah ka Jylla Conrad K Sangma ula ong ba ia ka Umroi Airport yn jer noh ha ka kyrteng u Bah B.B Lyngdoh bad ia ka Baljek Airport yn jer noh da u Myntri Rangbah ba nyngkong ka Jylla u Williamson A Sangma.
“Ngi sngew ba kine ki dei ki nongialam kiba la noh synniang shibun eh ia ka Jylla. Ki don ruh shibun kiwei pat ki Nongialam ka Jylla” ula ong.
U Conrad u pyntip ba ia ka runway jong ka Baljek Airport ruh yn sa nang pynheh bad ka jingiakren bad ka Airport Authority of India ka dang iaid shakhmat halor kane ka bynta.
