Shillong, K’lyngkot 31 : Ka Sorkar Jylla kala rai ban shong bishar biang ia ka Meghalaya Residents, Safety and Security (Amendment) Bill, ban pynthikna ba kan leh eiei halor ka jingrung kyrthep ki bar jylla ka ban iahap ne ym iatyngkhuh bad ki Ain ka Sorkar Pdeng.
Haba iakren bad ki nongthoh khubor, u Myntri Rangbah ka Jylla Conrad K Sangma ula ong “Ngim pat da peit bniah ia ka kam hynrei ngi la dep iakren ia ka. Ngi la dei ban don ka jingiasyllok bad ki kynhun bapher bapher”.
“Ngin dang ban shim rai ia ka sngi bad hadien ngin sa shong bishar ia baroh kiei kiei bad ban wad ia ka lynti kaba biang eh, kaba ngin lah ban wanrah ia ka kyndon, kynjoh ia ka thong bad ka bym iatakhuh bad ki ain ka Sorkar Pdeng lem bad ka Riti Synshar ka Ri” ong u Conrad.
Ha u snem bala lah, ka Ministry of Home Affairs (MHA) kala pynphai ia ka MRSSAB, 2020 bad kala kdew ba ka sienjam ban pynieng ia ki facilitation centre lane check gate kat kum ka Bill kan ktah ia ka rung ka mih ki briew lyngba ka Meghalaya, kaba dei ka lynti iaid sha kiwei pat ki Jylla (transit state).
