Shillong, Naitung 07 : U Myntri kam bording Abu Taher Mondal ula pyntip ba ka Meghalaya Energy Corporation Limited (MeECL) kala rai ban pynjynsur noh ia ki kynta pynlip bording da ki bynta bynta.
“Mynta ka aiom ngi la ioh pyllang ia bun bah ka bording da ka jingiakut ba haba don ka jingpynmih tam ia ka bording, ngi sa pynphai noh sha ki. Ngi dang ialeh ia kane ka kam” ong u Mondal.
“Nalor kane, ngi la nang pynduna ruh ia ka jingthied bording namar ka don ka khep ba ngi la thie ia ka bording ha ka dor ka ba rem bha. Kumta, ngi sa sangeh ban thied ha ka dor ba rem. Ta ka daw ngi la pyrshang ban khmih ba kloi katba lah ngin pynduna noh ia ki kynta pynlip bording. Ka Jingpynlip bording ka lah ban don hynrei ngin pynduna noh ia ki kynta” ula bynrap.
Haba kylli, u Mondal ula ong “Ia mynta, kam don satia kano kano ka lad ban weng ia ka jingeh hynrei ia kaba hadien habud, ngi la leh ia ki kam bapher bapher ban lah pynbun ia ka jingpynmih bording, pynduna ia ki jingduhnong…Ngi la pyrshang ban leh eiei ha kaban weng noh ia ka jingeh n aka jingduna bording”.
Ha ka sngi Balang, ka Iingkashari Meghalaya High Court kala bthah ia ka Jylla ban ai ia ka kaiphid kaba bniah kaba kdew halor ki sienjam ban khate ia ka jingduna bording hapoh ka Jylla. Kala bthah ruh ia ka Jylla ban pyniaw ia ki sienjam ba kala shim ban pynioh bording shuh shuh n aka National Grid bad kiwei ki tyllong kiba don ban pyndap ia ka jingduna bording ha ka Jylla.
U Mondal ula ong ba ka Sorkar Jylla ka burom ia ka jingbthah bala ai da ka Iingkashari Meghalaya High Court.
“Phi iohi ba ha kine ki khyndiat sngi ne bnai, ngi la thied ia ka bording ha ka dor kaba rem bha kaba kot sha ka T. 3 klur shisngi. Lada ka bording ka don, ngi lah ban thied, kam don jingeh satia ia kata hynrei ka dor ka dei kaba ngi hap ban peit. Kaba kongsan eh ka dei ka jingdon ka bording ha ki iew. Ngi thied na ki kompani shimet ruh hynrei ka dork a long kaba rem bha” ula ong.
Pule lang ia kane: Shah wiang ding ka kali Pulit ha Laitumkhrah Police Station ba shah shoh ki Khynnah Khasi
