Shillong, Naitung 12: Ka Iingkashari Meghalaya High Court hynne ka sngi ba-ar kala rai ban khmih lang ia ki nongrim jong ki Nongmudui (karkhana coke), kiba shah ktah da ka hukum ban pynpra noh ia ki Karkhana, kaba la pynsangeh da ka Iingkashari Supreme Court dang shen.
Ha ka hukum haba shong bishar ia ka PIL, ka Iingkashari Full Bench bala khlieh da u Chief Justice Sanjib Banerjee kala ong “Hynrei, ka nongrim bala pynpaw da ki nongmudui hakhmat ka IIngkashari Supreme Court ka dei ia kaba hap ban khmih lang, bad namar kane, la ailad shitaiew ia ki nongmudui bala pyniasaid da u Mahanta, ba kin file ia ka application ba kynthup ia baroh ki nongrim ban pynkylla ia ka hukum ba 24 tarik Jymmang 2022 bad ruh ban ialeh pyrshah ia ka jingai jingmut jong u Justice Katakey kumba la kdew ha ka kaiphod ba 23 tarik Jymmang 2022”.
Ha ka 27 tarik Jylliew, ka Iingkashari Supreme Court kala pynsangeh ia ka hukum jong ka High Court ban pynpra noh ia ki karkhana coke hadien ba shong bishar ia ka mukotduma Special Leave Petition bala mudui da ka kynhun kaba pyniaid ia ki karkhana coke hapoh ka Jyla.
Ka Iingkashari ka ong ba da ka hukum jong ka Iingkashari Supreme Court, la aipor ia ki nongmudui hakhmat kane ka Kashari ba kin applai ba kin iadonlang ha ka jingbishar ia ka mukotduma ba dang iaid mynta bad kane ka Iingkashari ka sngew dei ban sngap lang ia kine ki nongmudui khnang ba kan lah ban pynjlih ia ka hukum bala pynmih ha ka 24 tarik Jymmang 2022.
Ka Iingkashari ka ong ba ka hukum jong ka Iingkashari Supreme Court ka ong ba ka jingud jingnam jong ki nongmudui ha kane ka Iingkashari ba hakhlieh duh ka Ri ka long kaba pyrshah ia ka hukum ba pynmih ha ka 24 tarik Jymmang 2022 ia kaba ka High Cpirt kala pdiang ia ki jingshem bala buh jingthoh ha ka report ba 23 tarik Jymmang 2023 jong u Justice BP Katakey.
