Shillong, Naitung 12: U Myntri Rangbah ka jylla u Conrad K Sangma, hynne ka 12 tarik Naitung ula plie ia ka P.A. Sangma Fellowship for Legal and Policy Research ha Yojana Bhawan.
Privileged to launch along with our Hon’ble Law Minister, Sh. @JamesSangma1, the P A Sangma Fellowship for Legal & Policy Research in collaboration with the National Law School of India University, Bengaluru.@PMOIndia @KirenRijiju pic.twitter.com/IwlwrY2sq1
— Conrad Sangma (@SangmaConrad) July 12, 2022
Ha kane ka sngi la iadonlang u Myntri ka tnad Ain u James PK Sangma, ka Chief Secretary ka jylla ka Kong R V Suchiang, u Secretary ka tnad Ain u Bah C.V.D. Diengdoh bad Prof Sony Pellissery na ka National Law School of India University.
Haba kren ha ka jingialang u Conrad K Sangma u la ong, ka jingthmu ban don ka fellowship bad research ha kaba iadei bad ka jingthaw iaki policy treikam kadei kaei kaei kaba la leh klet baroh shi katta.
“Watla ngi don ia ki Ophisar bad ki Nongthaw Ain, ngim dei pat kiba shemphang ha kiba bun ki kam kiba rit ba ria kiba long kongsan ha ka kam thaw ain. Ka thong hi ka long ban pynthikna ba ngin buh ia ki paidbah hakhmat eh lyngba kane ka jingiatreilang ba kham phylla hapdeng ka Judiciary bad ka Legislative na ka bynta ka jingmyntoi jong ki paidbah” ula ong
U Myntri Rangbah u la ong, lada ka don ka jingwad bniah ha kaba iadei bad ka jingthaw iaki polisi treikam kan long kaba biang dur bha ha ka rukom pynwandur iaka rukom treikam bad ban leh ia katei donkam ban pyntbit ia baroh.
U Myntri Rangbah u la ong, ba u (L) P.A Sangma u dei u briew uba shemphang bha uba tip bha iaka Ain, kam pathai khubor, kam hikai bad Politik
“U dei u briew uba sngewthuh bad tip bha iaka ain bad ula long ruh kum u nongiasaid ain bad ula shemphang bha haka kam thaw Ain kum u nongthawain haba ula rung ha ka kam sain pyrthei kumta ka long kaba iahap bha ban ai nam ia ka kyrteng ka jongu ia kane ka fellowship programme” ong u Conrad.
Katba u James PK Sangma u la ong, watla ka jylla Meghalaya kadei kaba rit ki don ki raieh raidam haka imlang sahlang bad ka ioh ka kot, ki jingeh ha kaban pynbeit iaka rukom ai jingshakri paidbah, ki jingeh ha kaban pynthikna iaka jingnihkhmat bad jingiashimbynta bad ka jingtynjuh kaba kham eh, kadei ban ai ka jingshakri ia ki paidbah ha ka lybti kaba bha, kaba biang por bad ka bym noh shilliang..
U la ong, ka rukom shakri paidbah ka.long kaba suki bha naduh ka jingwad bniah, jingmir jingmut, jingpyntreikam bad jingkhmih bniah katba ka jingangnud u paidbah ka long kaba heh kumta da kaba phaikhmat ia katei donkam ban pyntbit na ka por sha ka por bad kumjuh ruh ban iaid katkum ka jingiaid bad jingkylla ka por.
Ha katei ka jingialang la wan iashimbynta da ki ophisar na ka tnad Ain, ki samla pule ain bad ki nongleh Research..
