Shillong, Naitung 12: U Nongialam ka Liang Pyrshah bad Myntri Rangbah barim Dr Mukul Sangma hynne ka sngi ba-ar ula ong ba ka All India Trinamool Congress (AITC) kan khyllie ban pynbeit biang ia ka soskular pynbeit khappud lada ka shah jied ban shimti ia u lakam ka jingsynshar ha u 2023.
Haba kren ha ka jingialang pynrung dkhot ha Rongjeng, East Garo Hills, u Dr Mukul haba khein kam kai ia ki jingiaknieh long trai jaka da ki artylli ki Sorkar Jylla (Assam-Meghalaya), ula ban jur ia ka jingiadon ryngkat bad ki nongshongshnong kiba shong ba sah ha ki jaka ba don ki jingiakajia pud.
“Kaei kaba iakren hapdeng ki artylli ki sorkar kam shym la long kat kum ka jingkhmih lynti bad kaba pdiang da ki paidbah ka Jylla. Haba ki paidbah kim pdiang ia kane, balei ba kane ka Sorkar ka shu leh donbor “ ula buh jingkylli.
U Dr Mukul ula ong “Ka dei ka kamram jong ngi kum ki riewsain pyrthei bad ki dkhot jong ka Party (AITC) ban iada iala ki jong ki briew. Ta ka daw, ngi la kut jingmut ban pynthikna ba ngin pynkylla biang ia ka soskular lada ngi shah jied ban wan ha ka bor”.
Une u Myntri Rangbah barim ka Jylla ula pynrem jur ia ka jingkwah ban pharia jong kane ka Sorkar buhrieh ka BJP bad ka jingbym lah ban ai ka jingsynshar kaba bha hapoh ka Jylla. U Dr Mukul ula pynrem jur ia kane ka Sorkar halor ka jingbym lah ban iasaid iala ka jong ka hok longtrai ia ki jaka puta ha khappud.
U Dr Mukul ula ong “Ngi la dep batai bniah ia ka hok long trai jong ngi halor kine ki jaka ba iakajia bala kyrshan da ki kot ki sla bad ki dulir na ka tnad Revenue” haba bynrap “Nalor ki dulir naka Tnad, la don ruh ki map naduh ka por synshar ka ri Bilat ia kaba la dep ban aiti. Ta ka daw, mano ba ai ia ka hok sha ka sorkar MDA ban pharia ia ka Meghalaya?”.
Nalor ka kam pynbeit khappud, u Dr Mukul Sangma ula kren ruh halor ka jingleh bym hok jong ka Sorkar Jylla pyrshah ia ki Nonghikai SSA bad ki Nonghikai MTET.
