Shillong, Naiwieng 04 : U Myntri Rangbah Conrad K Sangma ha ka sngi Balang ula ong ba u sngewsih jur ia ka jingmih noh ka United Democratic Party (UDP) na kynhun synrop MDA hadien 11 ngut na ki MLA ka party kila phet seng.
U President ka UDP Bah Metbah Lyngdoh ula hiar shuki kum u Myntri hadien ba 8 ngut ki MLA kila leit iasoh sha ka BJP bad 3 ngut sha ka NPP.
Haba jubab ia ka jingkylli la u sngewmong halor kane ka jingjia, u Conrad ula ong “Hooid, ban iakren hok, nga sngewsih bha. Kane kam dei kaba ngi jied lane dei ban jia. Ka sain pyrthei hi kam dei eh tang halor kaei kaba ngi kwah ban leh, ki don ki daw bad teng teng phi hap ban shim ia ki rai”.
Ula iathuh ba ka NPP ka khlem pynbor ia ka UDP ba kan weng noh ia ka jingkyrshan.
“Nga don ka jingiadei ba kyrpang bad ki nongialam ka UDP. Ngi kwah eh ba ki iai donlang beit bad ngi. Ngi khlem ong ne bthah ia ki ban weng noh. Ka dei ka rai ba kila shim hi dalade” ong u CM.
U Conrad ula batai ba hadien ba bun ngut ki MLA kila phet, ka shuki Myntri kam dei shuh kaba lah ban pynksan, kaba lam sha ka jingiehnohkam u Bah Metbah bad ka jingweng noh ka party.
“La ka dei ka jingiehnoh kam na ka kynhun Mhntri lane weng ia ka jingkyrshan, ka dei ka rai jong ka UDP marwei. Kam dei kaei kaei Nga kum u President ka NPP nga bthah ia ki ban leh” ula ong.
Ula bynrap ba u kyrmen ba ki jingiakren kin dang iai bteng wat hapdeng ki jingiapher ha ka sain pyrthei.
