Shillong, Nailur 16 : Ka High Powered Committee (HPC) hynne ka sngi Thohdieng kala rai ban ieh ha ka jingstad jong ka Sorkar Jylla ban shim ia kano kano ka sienjam pynsajia pyrshah ia ki kynhun kiba donkti halor ka jingkhyllem u dome ka Iingdorbar Thaw Ain ba thymmai ka Jylla.
“Ngin ieh ha ka jingstad jong ka Sorkar Jylla ban rai ia kine ki kynhun (ba kynthup ia ka Contractor, ka Designer bad ka PMC)” ong u Lamphang ka Iingdorbar Bah Metbah Lyngdoh uba dei ruh u Chairman ka HPC haba iakren bad ki nongthoh khubor hadien ka jingialang jong ka HPC.
U Bah Metbah ula pyntip ba hadien ka jingiohpdiang ia ka kaiphod naka Indian Institute of Technology, Guwahati (IITG), ka Sorkar kala ai ia ka show cause sha ka kompani ba leh ia ka design bad ka kompani ba shim contract ia ka Kam. La pyntreikam ruh ia ka penalty clause ne ka kynhun dain kuna pyrshah ia ka kompani ba leh design, kaba la pdiang bad kular ban thung ia u briew Technocal uba lah ban khmih ia kane ka project.
U Bah Metbah u pyntip ba ka kompani ba leh design kala mynjur ruh ban pynkhreh ia ka design ba thymmai jong u dome khlem kano kano ka jingsiew.
“Kumba ai jingmut da ka IITF ha ka kaiphod ban pyndonkam da ki tiar kiba sting haba shna ia u dome, ngi la mynjur ba ngin shna noh ia u dome da ki tiar ba sting” ong u Bah Metbah haba bynrap “La pyntip sha ngi ba u design ba thymmai yn sa dep noh hapoh ka lai taiew. Ngi la mynjur ruh ba ka kompani ba dei ban ai ia ka jingbatai ba bniah halor kane ka design ba thymmai”.
U Lamphang ula pyntip ruh ba ka Kompani ba shim contract kala pdiang ba ka don ka jingbym biang ha ka rukom trei jong ka bad ong “Naba ngi la mynjur ban pyniaid shakhmat ia ka jingtei, ka kompani ba shim contract kala mynjur ban pynkhuid noh ia baroh ki jaboh jabain bala lum thup na ka jingkhyllem u dome”.
U Lamphang ula ong ruh ba ka Kompani ba shim contract kala kular ruh ban nang pynkhlain ia ka jingtei bad ban pynlong ia ka, kaba khlain. “Ka Contractor kala mynjur ba kan nym kam satia ia ka jinglut haba tei thymmai ia ki kam bala julor. Kala kular ruh ban buh ia u Technical Engineer ban peit thik pa thik ia ka jingkhlain jong ka jingtei” ula bynrap.
Kat kum ka jingong jon gu, ka kaiphod IITG kala kdew shai ba baroh ka jingtei jong kane ka Iingdorbar Thaw Ain ba thymmai ka Jylla ka dei kaba shngain.
Ha kajuh ka por, u Lamphang ula ong baka Sorkar kan sa rai ha kaban thung ia u Project Management Contractor (PMC) ba thymmai ha ryngkat u Sound Technocal Engineer khlem da pynslem shuh.
“Halor ka kam ba iadei bad ka jingbym don ka jingiatreilang na ka tnad PWD, ka Sorkar kan sa leh ia ka audit” ula ong.
