Shen yn rai ia ka jingiatreilang ka NPP-INC ha KHADC
Shillong, Nailar 22 : Ka Congress kaba don ha ka Liang Pyrshah kala rai ban leit mudui sha Iingkashari pyrshah ia ka jingleit iasoh ki 3 ngut ki MLA sha ka National People’s Party (NPP) haba pyntip ruh ba shen kan sa shim rai la kan bteng ne em ban iatreilang bad ka NPP ha Khasi Hills Autonomous District Council (KHADC).
Haba kren sha ki lad pathai khubor hadien ka jingialang jong ka party, u President ka Congress Bah Vincent H Pala ula ong “Ngi la iasyllok bad ki stad ain bad ngi la nang pynkhreh ia ki kot ki sla ba khlem pep ngin sa mudui da ka mukotduma. Kam don jingartatien ia kata”.
U pyntip ba ka party ka dang iasyllok bad ki stad ain ba kumno kin tynjuh ia ka hukum jong u Lamphang ka Iingdorbar Thaw Ain ban ai jingithuh ia ka jingleit iasoh ki laingut napdeng ki saw ngut ki MLA ka party- Dr Celestine Lyngdoh (Umsning), Charles Marngar (Mawhati) bad Gabriel Wahlang ( Nongstoin) sha ka NPP ha ka 19 tarik Nailar.
Haba pynpaw ba ka thong jong ka BJP ka long ban pynjah kyrteng syndon ia ka Congress hapoh ka Ri, u Bah Pala ula ong “ka NPP ruh kala don ia kajuh ka sur hangne- Meghalaya Congress Mukt. Ia kane ka sur la hikai da ka BJP. Ki paidbah ka Meghalaya ki dei ban tip ba ka jingiadei hapdeng ka NPP bad ka BJP kala nang khlain nang khlain”.
Nalor kane, une u President ka Congress ula pyntip ba kiba bun na ki nongialam ka Party kila pynpaw ia ka jingdonkam ba ka party kan mih noh na ka Executive Committee ba ialam da ka NPP ha KHADC bad kala ieh ha ki nongialam ka party ba kin shim rai shen halor kane ka kam.
Ka Congress mynta ka don satang 2 ngut ki MDC-u Bah Ronnie V Lyngdoh (Uba dei ruh u MLA ba sah marwei na Mylliem) bad u Bah Pynshngainlang N Syiem (Mawkhar-Pynthorumkhrah)- ha ka Iingdorbar ba 30 ngut ki dkhot hadien ka jingleit iasoh noh u Bah Charles Marngar bad u Bah Gabriel Wahlang sha ka NPP.
U Bah Pynshngainlang u bat mynta ia ka shuki Deputy Chief Executive Member (DyCEM) ha ka Executive Committee ba ialam da u Bah Pyniaid Sing Syiem.
U Bah Pala ula ong ba ka rai jongka Congress ban kyrshan ia ka EC ka NPP ha KHADC ka dei kaba la pynshong nongrim halor ki ishu ba iadei bad ka jingpynkylla thymmai ia ka Sixth Schedule jong ka Riti Synshar ka Ri bad ka jingphiah ia ki constituency hashuwa ka elekshon MDC.
 haba pyntip ruh ba shen kan sa shim rai la kan bteng ne em ban iatreilang bad ka NPP ha Khasi Hills Autonomous District Council (KHADC).){kind=link}