Shillong, Jylliew 24: U Bah Daniel Wahlang bad ka Kong Balarisha Thyrniang hynne ka Sngi Saitjaiñ kila jop ia ka jingiakob mareh Shillong 10K Run kaba Saw kaba la pynlong da ka Meghalaya State Olympic Association (MSOA).
Ka jingpynlong ia katei ka jingiakob mareh kadei shi bynta jong ka jingrakhe iaka International Olympic Day, kaba ju long ha man la ka 23 tarik u Jylliew kum ka dak jong ka jingthaw iaka Olympic Committee ha u snem 1894 bad la pynlong ia kane ka jingiakob mareh ha kylleng ki ri.
Ka Shillong 10K Run kadei ka jingiakob mareh kaba la pawbha, ha kaba da ki spah ngut ki nongmareh kila wan ban iashimbynta naduh ki samla haduh kiba la rangbah.
Ia kane ka jingiakob la plie da u Myntri ka tnad Sports and Youth Affairs u Bah Shakliar Warjri da kaba kaweh ia ka lama ha kaba la iadonlang ka Director jongka Sports and Youth Affairs ka Kong Isawanda Laloo, u General Secretary ka MSOA Bah Finely L Pariat bad kiwei kiwei.
Haba ai jingkren hashwa ban kaweh iaka lama, u Bah Shakliar ula ong, ba ki don haduh 80% ki khynnah samla kim ioh bha ban kilan met ialade bad ula kyntu ia baroh ba kidei ban ialeh ban long ki briew kiba smat kiba sting.
Kane ka jingiamareh kala sdang na Polo Ground Complex bad nangne ki nongmareh kila leit mareh sha 4th Furlong, BK Bajoria School, PGT College, Shillong Commerce College, Don Bosco Square, Laitumkhrah Police Point, Laitumkhrah Police Beat House, Fire Brigade, Dhankheti, Barik Point, Civil Hospital, State Central Library, Meghalaya Secretariat, Deputy Commissioner’s Office, Governor’s House, Ward’s Lake, ïingsah u Myntri Rnagbah bad la pynkut biang ha Polo Ground.
U Bah Daniel Wahlang ula wan Banyngkong katba u Bah Wolbetstar Ramsiej ula wan Baar bad u Bah Sainkupar Jyrwa ula wan Balai ha ka liang ki shynrang katba ha ka liang ki kynthei ka Balarisha Thyrniang kala wan Banyngkong, Baar la wan da ka Bandasharai Marwein bad ka Marqueenless Ramsiej kala wan Balai.
Kine ki nongjop kila iohpdiang mar T.7,000, kiba wan Baar kila ioh mar T.5,000 bad kiba wan ba Lai kila ioh mar T.3,000 katba kiba wan ba Saw haduh ba Phra kila ioh iaka Consolation Prize kaba mar T.1000.
Nalor kane la ai khusnam ruh ia ki nongmareh kiba la plat 50 snem ka rta ha kaba u Bah Badon Singh Tham ula wan Nyngkong, Bah Pynshngainlang Dkhar ula wan Baar bad Bah Kedrick Kharpor ula wan Balai.
Katba ha ka liang ki kynthei ka Bitiris Marbaniang kala wan nyngkong, ka Kong Starina Jasain kala wan Baar bad ka Kong Snora Rani kala wan Balai.
U Bah Shakliar Warjri bad ka Kong Isawanda Laloo kilasam ia ki khusnam sha kine ki nongjop baroh.
Pule ruh: Kyntu ka NPP iaka Sorkar Pdeng ban shim iaki lad ban wanrah biang iaka jingsuk ha Manipur
