Shillong, Lber 13 : Ki thei ïalehkai ka Shillong Cricket Association ki la ioh rah ia ka nam lahduh jong ka lympung ïalehkai U-15 Girls Inter-District Cricket Tournament 2025, kaba la pynlong da ka Meghalaya Cricket Association bad pyniaid da ka synjuk West Khasi Hills District Cricket Association ha madan Mawrusyiar, Nongstoin.
Ha ka jingïakhun phainal, ki thei ïalehkai ka Shillong Cricket Association, ki la lah ban pynliem ïa ka South West Khasi Hills District Cricket Association (SWKHDCA) da 41 run, kaba la khein da ka DLS Method hadien ka jingther kynsan u slap.
Ia ka jingkynting pisa la jop da ka SWKHDCA hynrei ka la ailad shwa ïa ka SCA ba kan wan tied nyngkong bad kane ka kynhun kala lah ban kamai bad buh ia ka thong ba 166/3 na ki 20 overs.
Ka Janvi Kumar Shah jong ka SCA kala kamai ia ka half century da ka jinglah tied haduh 58 runs (67 ball), nalor ka synniang ka Laviola L Mawlong 28 run (32 balls) bad Prisceca Nongpiur –16 runs (30 balls).
Na ki nongkawang bol ka SWKHDCA, ka Ribakordor Nongsiej ka la ïoh ba kan khur shi wiket naka bynta 40 run na ki 4 over.
Haba la wan ban beh ïa ka thong, ka SWKHDCA ka la shem pynban ïalade ha ka jingeh kaba jia hadien ba u slap ruh u la wan ban ther, bad kane ka pynlong ïa ki nongpynïaid ban pynhiar noh ïa ka jingiakhun sha ka 9.3 over, ha kaba ka thong ia ka SWKHDCA ka long 116 run.
Hadien ba la pynbeit thymmai, ki thei ïalehkai ka SWKHDCA ki la lah ban kamai 74 run hadien ba ki la hap noh 7 wiket, bad kane ka la biang pura ïa ki thei ïalehkai ka SCA ban rah ia ka nam kum ki lahduh jong kane ka lympung.
Ki katto katne ki thei ïalehkai kiba la kham paw ha ka pali kaba ar ki long ka Lawanjingkyrmen Lyngkhoi –13 runs (15 balls), Philadaplin Lyngkhoi –11 runs (9 balls).
Katba na ka liang ki thei kawang bol ka SCA ka Prisceca Nongpiur na ki 4 overs, ka la ai 17 runs bad khur 2 wickets bud pat sa ka Areniankit Warjri na ki 2 overs, ka la ai 10 runs bad 1 wicket, katba ka Laviola L Mawlong na ki 0.3 overs, ka la ai 3 runs, bad khur 2 wickets
Ki kynrem ki lyndan kiba la wan ban ïa sakhi lang ïa kane ka phainal ka kynthup ïa u Hony Secretary u bah Raynold Kharkamni, U Sengnab Momin, Vice President, Meghalaya Cricket Association, U bah Peter Macdonald Kharsawian, Apex Council Member, MCA, Lamborful Wanniang, President, Mawrusyiar Youth and Cultural Club, Shembor Rani, Secretary, Mawrusyiar Youth and Cultural Club, Wanpyntngenbor Lyngdoh Nonglait, President, West Khasi Hills District Cricket Association, Mebanphira Swer, General Secretary, West Khasi Hills District Cricket Association.
