Shillong, Iaiong 12 : Ka kynhun ialehkai Nongkhroh Sports Club kala ioh rah ia ka nam kum ka Champion jong ka lympung ialehkai phutbok ‘Ka 2nd U Mar Phalangki Knockout Football Tournament 2024’.
Kane ka lympung ialehkai ka dei kaba la pynlong da ka Federation of Khasi Jaintia & Garo People (FKJGP)-Nartiang Area Unit bad la pynhap pyrda ia ka hynne ka sngi da u President ka FKJGP Bah Dundee C Khongsit bad u General Secretary Bah Eldie Newton Lyngdoh.
Ha ka jingialehkai phainal, ka kynhun Nongkhroh Sport Club kala pynliem ia ka Friendship United Football Club da 2 kol la nod.
Ka Nongkroh kala ioh thep ia ka kol ba nyngkong ha ka kylla step bad nang pynskhem ia ka jingjop da ka jingioh thep biang sa kawei ka kol ha ka kylla miet.
Ka lahduh (Nongkhroh SC) jong ka lympung ialehkai kala ioh rah ia ka song pisa ba T. 2 lak ryngkat bad ki trophy, ki medal katba ka Friendship United FC kaba wan ba-ar kala ioh ia ka song pisa ba T. 1 lak ryngkat ka trophy bad ki medal.
Ia ka nam best player bad best goal keeper la ioh rah da ki rang ialehkai ka Nongkhroh SC.
