Kohima, Risaw 21 : U president ka BJP ka Nagaland u Temjen Imna Along ula khot ia u Myntri Rangbah (CM) ka Assam u Himanta Biswa Sarma kum u CM uba tbit bad uba shemphang shibun.
“Ngi don ia u CM uba shemphang ha Assam,” ong u president ka BJP ka Nagaland u Temjen Imna Along.
Une u president ka BJP Nagaland ula ong ba u CM ka Assam ula shim ia ka bynta kaba kongsan ban wanrah ia ka jingialong shipara bad ka jingiatylli hapdeng ki jylla ka thain shatei lammihngi (Northeast).
Ia kane une u president ka BJP Nagaland ula pynpaw haba phaikhmat halor ki mat kiba iadei bad ki kam ia pynbeit pud hapdeng ka jylla Assam bad ka Nagaland.
“Ia ka mat kaba iadei bad ki kam iakajia pud hapdeng kine ki artylli ki jylla ba markhap yn lah pat ban weng da kaba phaikhmat na ka bynta ka bha ka miat jong ki nongshong shnong jong baroh ki ar jylla,” ong utei u president ka BJP Nagaland.
“Ia kine ki kam iakajia pud kiba la neh da ki phew snem mynta yn sa lah pat ban weng hapoh ka jingialam jong u CM ba shlur bad ba shemphang jong ka Assam u Himanta Biswa Sarma u CM ka Nagaland u Neiphiu Rio bad u Dy.CM u Y Patton,” ong shuh shuh u Temjen Imna Along.
Shuh shuh u Along ula ong ruh ba u CM ka Assam barabor u long uba iatreilang bad ka Nagaland na ka bynta ban shim ia ki sienjam kiba thmu ban weng pat ia ki jingeh kiba mih na ki kam iakajia pud hapdeng kine ki ar jylla.
