Agartala, Nailur 30 : Na ka liang u state secretary ka CPI (M) u Jitendra Chowdhury ha ka sngi Palei ba la lah ula kynthoh pyrshah ia ka sorkar BJP ha Tripura namar ka jingshukor ia u paidbah da kaba shim burom sha lade ha kaba iadei bad ki kam pynroi bala leh da ka sorkar barim jong ka Left na ka bynta ban ioh nong ha ki kam sain hima sima.
Da kaba kam ba ka sorkar BJP kam shym la lah ban pyni kam wat tang khyndiat ruh halor ki kam pynroi, u Chowdhury ula ong; “Kam shym la don wat tang kawei ruh ka projek kaba la mynjur, la mang bad kaba la pyndep da kane ka sorkar kaba mynta.Phin sa iohi ia ki postar kiba heh ha kaba iadei bad ka skhim pynshna iing (PMAY).Ki nongioh jingmyntoi kiba la ioh ia ki iing ki sem lyngba kane ka skhim dang shen ki dei kiba la shah jied naduh ka snem 2011.
“Ha kaba kum katei ka por, ka party Left Front ka dang don ha ka bor synshar.Ka jia ryngkat ruh ba ha katei ka por Nga dang bat kum u myntri ki kam pynroi na ka bynta ki thain nongkyndong ha Tripura ha ka por ba la pynlong ia ka jingwan leh sorbe halor kane ka bynt.Hadien kane kam shym la don shuh kano kano ka jingleh sorbe bad la pynshong nongrim beit na ka kaiphot ba la pynkhreh da ka sorkar Left Front na ka bynta ka jingpynioh ia kine ki iing ki sem,” ong shuh shuh u Chowdhury.
Da kaba kynnoh ia ka sorkar pdeng bala lamkhmat da ka BJP halor ka jingleh shiliang khmat, u Chowdhury ula ong; “Lah saw snem kynthih, ka sorkar pdeng kam shym la lah ban pynioh ia kine ki iing ki sem.Baroh kine ki nong ioh jingmyntoi kila ioh pdiang ia kine ki iing tang ha kawei ka jaka.Ka la long kum ka kam shet shukor.Ka jong jong ki tiar ki tar, ka dor jong ki nongbylla bad kiwei pat ki jinglut jingsep kila nangkiew naduh kine ki saw snem kiba la leit hynrei ym shym la kyntiew ia ka jingmang pisa.”
Nalor kata ula ong ruh ba wat shwa jong ka aiom lehkmen, hynrei na ka liang ki paidbah kila pynpaw ia ka jingsngew bynniaw kaba jur namar kim pat shym la ioh satia ia ki jingsiew kiba dang sahteng jong ki lyngba ka jingpyntrei ia ka skhim TUEP bad MGNREGA.
Nalor kata u Chowdhury ula kynnoh ruh ia ka saffron party (BJP) halor ka jinghiar jong ka ioh ka kot ha ki thain nongkyndong.
Shuh shuh haba kren ha ka jingialang paidbah ha Teliamura, une u nongialam ka CPI-M ula kynnoh ruh ba ka jingshah ktah jur lyngba ka jingpynkylla ia ka pisa bad ka jingpyntreikam ia ka GST kala ktah jur ia ka ioh ka kot ha ki thain nongkyndong jong ka ri.
