Agartala, Nailar 26 :Ha ka jingjia ia kaba la iohi kum ka jingpyrshang ban pynhun ha ki kam sain hima sima da ka sorkar BJP ha Tripura, u hehduh ka RSS, u Mohan Bhagawat un wan poi ha Agartala na ka bynta ban iakynduh ia ki dkhot ka longiing syiem ka Tripura.
Hadien ba ula wan poi ha MBB airport ha Agartala, une u heh ka RSS, u Mohan Bhagawat un leit beit beit sha Ujjayanta palace na ka bynta ban iakynduh ia ka Rajmata Bibhu Kumari Devi kaba dei ka kmie jong u chairman ka TIPRA, u Pradyot Debbarma.
Kane ka jingthmu iakynduh hapdeng une u heh ka RSS bad kane ka longiing ka la pynmih ia ki jingsngew ba ka BJP kala pyrshang ban khroh ia u Pradyot Debbarma, uba la long long kum u shiah na ka bynta ka BJP ha Tripura.
Kham hashwa, ka BJP kala pyrshang bun bun sien ban khroh ia u Pradyot Debbarma lyngba kiba bun ki jingtyrwa, kata kaba kynthup ia ka Rajya Sabha seat bad ka kam myntri ha ka sorkar pdeng.Hynrei baroh kine ki jingpyrshang kim shym la seisoh.
Lah ban kdew, ba ka BJP kala duh noh ia jan baroh ki ktem ki jong ka ha ki thain jaka lum bad ha ki jaka shong shnong ba bun ki trai shnong riewlum ha Tripura, kaba long haduh kumba 25 tylli ki assembly seat na ki 60 ngut ki dkhot ka dorbar assembly ha ka TIPRA party jong u Pradyot Debabarma ha ki ilekshon TTAADC ha ka snem ba la dep.
Nalor kata, unongialam ka BJP u Hansa Kumar Tripura ha ryngkat ki 6000 ngut ki nongkyrshan kila leit ban pyniasoh bad ka TIPRA ha kine ki khyndiat sngi ba la dep.
Ha kawei pat ka bynta, u chairman ka TIPRA, u Pradyot Debbarma ula pynshai ba kane ka jingwan jurip jong une u nongialam ka RSS sha ka longiing jong u kam don kano kano ka jingiadei bad ki kam sain hima sima.
U Pradyot ula ong ba u Mohan Bhagwat ula pynpaw ba u don ia ka jingthrang ban iohi ia ka shuki syiem bad ban iakynduh ruh ia ka Rajmata.
“Kum ka jingpynpaw ia ka jingsngew burom, la khot sngewbha ia u sha ka iing syiem, bad kam don kano kano kaba palat nalor kane,” ong u nongialam ka TIPRA u Pradyot Debbarma.
Nalor kata ula ong ruh; “Ngam don kano kano ka jingialang bad u.U Bhagwat u wan jngoh ia ka iingsyiem bad tang ban iakynduh ia ka Rakmata.”
