Shillong, Iaiong 28: Ka Meghalaya Pradesh Mahila Congress ka pynpaw ïa ka jingsngewsih bad ka jingpyrshah kaba jur halor ka jingpynbna khang dukan da ka kynhun Barabazar Merchants and Traders mynta ka sngi ka 28 tarik u Iaiong ha Iewduh.
Kane ka rai ban khang dukan, katkum ka Mahila Congress, kan ktah jur ïa ki paidbah kiba la mad shibun ka jingshem jingeh ha ka imlang sahlang bad ha ka jingïoh jingiarap.
Ha ka kyrwoh, ka President jong ka Mahila Congress kong Joplyn Shylla ka ong ba ha kum kane ka por ba ki paidbah ki dang shem jingeh na ka ioh ka kot namar ka jingkiew dor ki marbam mardih, ka jingïaid beit ki kam dukan ka long kaba donkam tam.
Ka MPMC, ka pyrshah ïa ka rukom pynbna khang dukan khlem da ïaid lyngba ka lynti ba biang.
Ka kyntu ïa ki nongpyniaid bad ki bor synshar ba kin shimkhia bad pynbeit noh mardor ïa kane ka jingeh da kaba buh ha khmat ka bha ka miat jong ki paidbah.
