Pyrshah ka HYC ia ki jingpakhang surok ba wan ki VIP

Shillong, Jylliew 4: Haba pyrshah jur ia ka jingkhang ia ki surok ba wan ki heh ki hain, ka Hynniewtrep Youth’ Council (HYC) hynne ka sngi Palei, kala dawa na ka sorkar ba kadei ban pynthymmai lut ia ki bynta jongka jingai jingiada, kaba pynshitom ia ki riew paitbah”

Ha ka kyrwoh khubor, u President ka HYC u Bah Roy Kupar Synrem ula ong, ba ka jingleh ban khang ia ka jingiaid ki kali haba iaid ki heh ki hain kala wanrah ia ka jingthud bad jingeh ha Shillong, kaba la ktah ia ki khynnah pule, ki kmie ki kpa, ki nongbylla sngi bad ia ki nongkhaii.

“Man la ka por, la khang shipor ia ki surok, ki kali kila sahkut lut bad la pyntreikam ia ki jingpyrkhing ban iaid ki kali” la pynpaw ka HYC bad ka bynrap ba kane “Kadei ka bym lah pdiang na ka bynta ki hajar ngut kiba hap ban mad ia ka jingeh tang na ka daw jong ki katto katne ki heh ki hain.

Ka Council kala ithuh ia ka jingdonkam ban ai jingiada hynrei kala banjur pat ba ym dei ban pynthud pat ia ka leit ka wan jong ki paitbah.

“Ki paitbah ka Meghalaya kim dei ki nongshong shnong ki bym don dor ne “Second Class Citizen” la ong ha ka kyrwoh bad ka bynrap “Ki surok paitbah kidei na ka bynta ban pyndonkam ki paitbah bad ym dei ban khang man la ka por haba ki kali jong ki heh ki hain ki iaid lyngba”.

Kane ka jingpynpaw ka HYC kadei hadien ba hynne ka sngi Palei kala mih ka jingsahkut lut jong ki kali ha ka thain Polo, ha kaba ki pulit kila khang ia ki kali hashwa ba wan u Myntri Kam Pohiing ka ri kaba la lam sha ka jingsahkut lynter jong ki kali bad kala mih ruh ka jingiania hapdeng ki nongleit nongwan bad ki majistor.

Da kaba dawa ba dei ban pynkut noh ia ka kolshor leh ba heh ne “VIP Entitlement” ka Council kala ong, “Dei ban pyntreikam ia ki kyndon ai jingiada ha kata ka rukom ba kan pynduna ia ka jingpynthud ia ka jingim kaba man la ka sngi bad ban burom ia ka hok jongki nongshong shnong”. Kala kdew ba ki khynnah pule, ki nongpang bad ki nongtrei ruh ki long kiba kongsan ym tang ki heh ki hain kiba wankai.

Ka HYC kala kyntu ia ki bor kiba dei khmih ba kidei ban bishar bniah biang ia ka rukom pynkhreh khnang ban ym pynthud lut ia ki paitbah ha kitei ki jingwan da kaba pynkut ruh da kaba ong “Hooid ia ka jingshngain. Em ia ka jingmad jingeh ki paitbah”.