Shillong, Nohprah 21: Ka seng Hynñiewtrep National Youth Movement (HNYM) hynne ka sngi kala kynnoh ba kidei ki jaidbynriew Garo kiba la kam ïalade kum ki Rangbah Shnong kiba la ai Non Objection Certificate (NOC) na ka bynta ban buh Casino ha Ribhoi District.
Haba kren sha ki lad pathai khubor u president ka HNYM u bah Louis Dohtdong u la kam ba ka jingdawa ki jaidbynriew Garo ban ïoh sanad ban long Rangbah Shnong ka long ka bym ïahap namar katkum ka Riti Dustur jong ka jaitbynriew Hynñiewtrep ka ktien sanad la ai tang sha ki Rangbah Shnong Khasi bad ym lah ban ai sanad ïa ki Rangbah Shnong Garo.
U bah Louis u la ong ba ka jingdawa jong ki Garo ka long ka bym shong nia bad ka long beaiñ beiriti namar kim don hok ban wan kam trai hapoh ka bri u hynñiewtrep namar ki dei tang ki raïot.
“Katkum ka sakhi ba ka seng ka ioh, kidei ki jaidbynriew Garo kiba la kam ïalade kum ki Rangbah Shnong kiba la ai NOC na ka bynta ka Casino bad kaei kaba sngew sammut ka long ba wat u Syiem ka Raid Myrwet ruh u la pdiang ïa ki Garo kum ki Rangbah Shnong” la kynnoh u bah Louis.
U bah Louis u la iathuh ba ha ka 2 tarik u bnai Naiwieng 2022 ka la don ka jingialang hapdeng ka Hima Mylliem, Syiem ka Raid Myrwet, ki Rangbah Shnong Garo bad ha kane ka jingialang ka seng ka la kren shai ba kan nym pdiang ïa ki Garo ba kin bat kum ki Rangbah Shnong namar ïa ki Garo la ithuh ïa ki tang kum ki nongpyniaid shnong.
U bah Dohtdong u la ong ba lada ki Khasi kim lah ban kam Nokma hapoh ki shnong Garo te kumno ki Garo kin lah ban kam ïa ka jinglong Rangbah Shnong hapoh u pud u sam jong ka Khasi Hills Autonomous District Council (KHADC).
U nongialam ka seng HNYM ha kajuh ka por u la iathuh ba ka seng dawa ban weng noh mardor ïa u Acting Syiem ka Hima Mylliem u Paiem Ainam Syiem bad ïa u Syiem Raid Myrwet u Paiem Kynsing Syiem bad kumjuh ruh ban weng noh ïa ka kyntien ‘Nongpyniaid Shnong na ka Mylliem Act, 2007’.
