Shillong, Iaiong 02: Ka kynhun ki rang bad ki thei siat khnam ka Meghalaya ki la wanrah nam bad burom da ka jingioh khur takma ksiar ha ka lympung ialehkai jong ka Khelo India Tribal Games, kaba long ha Chhattisgarh.
Ka kyrwoh na ka synjuk ka Archery Association of Meghalaya ka pyntip ba ia kine ki takma ksiar ka kynhun ki rang bad ki thei ialehkai ka jylla ki la ioh ba kin khur ha ka kyrdan iakhun ka Compound.
Haba phai sha ka jingiakhun ki khynnah kynthei, ka kynhun ka Meghalaya ki la lah ban pynliem ia ka Nagaland , ia kaba la mih madan da ka Nakibansharai Khonghat(East Khasi Hills), Kate Diamond Lyngdoh(East. Khasi Hills) bad ka Stracy M Sangma (South Garo hills).
Katba ha ka jingiakhun ki khynnah shynrang, ka kynhun ka la lah ba kan pynliem noh ia ka Assam, ia kaba la mih madan da u Donkupar L Shadap (Ri-Bhoi) Khelo India, u Phrangkupar Kharjahrin(Nongstoin) bad u Banwanbor Marwein (Nongstoin)Khelo India.
Ia kane ka kynhun la ialam da u Head Coach cum High Performance Director u Mim Bahadur Gurung, nangta u Nandkishore Compound Head Coach, u Jag Prasad Thapa Archery Coach bad kong Bansaralin Dhar Archery Coach ka jylla.
