Shillong, Nohprah 20 : U Nongialam ka UDP bad Myntri Sorkar ma Kyrmen Shylla hynne ka sngi ba-ar ula ong ba ym lah satia kino kino ki Political Party ban kam burom halor ka jingpyntreikam ia ki skhim Sorkar hapoh ka Jylla.
“Ki skhim bala ai sha ki paidbah kam dei jong kino kino ki political party. Ngim lah ban ong ba kane ka skhim ka dei jong ka NPP lane ka UDP namar ka dei jong ki paidbah ka Jylla” ong u ma Kyrmen haba iakren bad ki nongthoh khubor haba jubab ia ki jingkynnoh ba iaka skhim FOCUS la pynman ba ka dei ka skhim NPP.
U Myntri ula ong ba lada u Myntri Rangbah lane ka NPP ka kam ba ka FOCUS ka dei ka skhim jong ki, kane hi ka dei kaba bakla namar kim don hok ban leh ia kata.
Haba pynpaw ba ki jingkynnoh kin iai mih beit, u ma Kyrmen ula kyntu ia ki paidbah ban pdiang ia ka skhim lada ki ai jingmyntoi shisha ia ki ha ka jaka ban sngap ia kiwei.
“Lada kiei kiwei kiba kiwei ki Political Party ki kynnoh pyrshah ia u Myntri Rangbah (halor ka FOCUS) ki dei kiba shisha, ka shong ha ki paidbah ba kin leh eiei ha u 2023 hynrei lada kim dei kiba shisah, ki dei ban tip ruh kumno ba kin leh” ula ban jur.
