Kynnoh kyntur pud ka Shnong Mookhep bad ai NoC ia ka kompani
Shillong, Iaiong 02 : Ka Dorbar Shnong Wapungskur ha East Jaintia Hills District ha ka sngi Balang kala pynpaw ia ka jingpyrshah kaba jur halor ka jingthmu ban seng ia ka karkhana coke hapoh u pud u sam jong ka Shnong.
Kane kala wan hadien ba ka Meghalaya State Pollution Control Board (MSPCB) ha ka 7 tarik Lber, kala ai ia ka jingbit ban seng ne Concent to Establish (CoE) sha ka Om Om Coke ba kan buh ia ka LAM Coke Manufcaturing Unit ba kawei ka atoskhana (chimney) ha Thlakuru, Mookhep, kaba la manghaduh T.4.50 klur.
Kane ka CoE ka treikam haduh ka 28 tarik Rymphang 2026 lait noh satang da pynsangeh shipor ne pynduh noh. Ia kane ka por lah ban pynjlan lada donkam tad haduh ka por b aka karkhana ka long kaba la pynkhreh ban mih ia u mar.
Ka Dorbar Shnong Wapungskur bala ialam da u Rangbah Shnong Postling Dkhar haba iohpdiang ia ka jingtip, ula pynlong mardor ia ka jingjurip ia ka jaka, kaba la ai CoE bala pynshong nongrim na ka No Objection Certificate (NoC) jong ka Dorbar Shnong Mookhep bad shem ba ka jaka ka dei kaba dang hap hapoh u pud u sam ka Wapungskur.
“Nga kyndit halor kane ka kam ka bym lah ban pdiang da u Rangbah Shnong ka Mookhep. Watla u tip bha ba ngi don ia u pud u sam uba shai kdar, ula iaid shakhmat ban ai NoC ban buh ia ka karkhana coke ha ka jaka jong ngi” ong u Bah Dhar.
“Kumta, ngi la wan hangne mynta ka sngi ban pynpaw ia ka jingpyrshah kaba jur pyrshah ia ka jingwan kyntur sha u pud u sam jong ngi da ka Shnong ba marjan. Kane ka dei kaba bakla shi katdei eh” ula bynrap.
Kat kum ka jingong jong u, ka jaka ba thmu ban buh karkhana ka dei ka jaka khlaw kaba la sumar da ka Dorbar Shnong Wapungskur bad ka dei kaba jngai na ka shnong Mookhep.
U Rangbah Shnong ka Wapungskur ula pyntip ruh ba ha ki snem bala leit, ka Dorbar Shnong kala kyntait ia kiba bun ki jingkyrpad ban seng ia ka karkhana coke hapoh u pud u sam ka Shnong haba buh hakhmat ia ki jingmyntoi ki nongshongshnong namar kane kan wanlam tang ia ka jingpynjaboh ia ka lyer bad pynjot ia ka mariang.
“Namar kata, ngi la rai ban wan shane manla ka sngi ban pynthikna ba ngin ym shah ban seng ia ka karkhana coke ha ka jaka jong ngi” ong u Bah Dhar haba dawa ia ki trai ka kompanu ba kin pynkyn riah noh sha kawei pat ka jaka ha kaban seng ia ka karkhana.
