Shillong, Lber 14 : Ka Khasi Students Union-West Jaintia Hills District, kala pyrshah jur halor ka jingkam jong u Myntri Rangbah ka Assam Himanta Biswa Sarma, ba ka shnong Mukroh ka dang hap hapoh ka Jylla Assam.
“Ka Seng kam lah ban pdiang ia ka jingkam jong u Myntri Rangbah ka Assam ba ka Mukroh ka dang hap ha ka West Karbi Anglong, Assam” ong u President ka KSU-WJH samla Laitphar Syngkrem haba sot ia ka jingkren u Himata Biswa Sarma hapoh ka Iingdorbar Thaw Ain ka Assam.
Une u Nongialam ka KSU-WJH ula pynshai ba ka shnong Mukroh ka dei ka jaka kaba pura jong ka West Jaintia Hills District naduh bala pynkha ia ka Meghalaya ha u snem 1972 haba ong “Ha kane ka shnong, la shong la sah tang da ki Khasi-Pnar naduh ki por kulong kuman bad ka dei kaba hap ruh hapoh ka Elaka bad Hima Khasi-Pnar”.
Ha kajuh ka por, ka KSU-WJH kala kyntait ruh ban pdiang ia ka jingkynnoh u Himanta ba ka jingther kuli jong ki Pulit Assam dang shen ha Mukroh ka dei namar ba don ka jingakynad kala mih hapdeng ka Assam Forest Protection Force- ki Pulit Assam bad ki nongtuh dieng.
“Kane kam dei ka jingshisha..ha ka jingshisha hi, kat kum ka riti ka dustur u Khasi, ka khlaw ka dei jong ka shnong, ne ka Raid ne ka Elaka kaba mut ka dei jong u paidbah ym jong kano kano ka Sorkar. Kumta ha man la ki khlaw ha ka Bri u Hynñiewtrep ki bym hap ha ki kyndon pyrkhing ‘Law Adong, Khloo Blai, ‘Law Shnong, ki nongshong shnong ki lah ban thoh dieng katkum ka jingdonkam ka jong ki” kala ong.
Ka KSU kala ong ba ki paidbah ha Mukroh ki ju leit thohdieng na ki khlaw jong ka shnong ban pyndonkam ha ka shet ka tiew bad ka dei ka hok ka jong ki paidbah naduh ki por u mynbarim u mynbajah bad ki sorkar khamtam ki sorkar nongwei kim don hok ban kam trai ne tuklar ia ka nongkynti ki Khasi-Pnar.
Ka KSU kala pynpaw ruh ba ka jingkam u myntri rangbah ka Assam ka long kaba bakla shibun eh bad ka pynpaw ba u kwah kam ei ia ka khlaw shnong bad ia ka shnong Mukroh baroh kawei.
“Ki paidbah ka Mukroh ha ryngkat ki paidbah ka West Jaintia Hills lem bad ki paid ka Bri U Hynniewtrep baroh kawei kin ym ailad da leilei ruh wat tang shi inshi ka jaka u Khasi kan leit sha Assam” kala ong.
Ka KSU WJHDU ka kyntu ruh ia ka sorkar Meghalaya ba ka dei ban leh eiei halor katei ka jingkam namar ka pyni ba wat hapdeng ka jingiapynbeit pud ki ar jylla, ka Assam im im peit peit, ka iai kam trai beit ia ki shnong Khasi ha man la ki jaka ba don ha khappud.
