Shillong, Nailur 08: Ka Khasi Hills Autonomous District Council (KHADC) hynne ka sngi palei, kala pynpaw ia ka jingpyrshah kaba jur ia ka rai jong ka Sorkar ban pyntreikam ia ka Code of Criminal Procedure (CrPC) bad Code of Civil Procedure (CPC) ha ki jaka ki paid riewlum jong ka Jylla.
Kane ka jingpyrshah kala mih tang shisngi hadien ba ka Sorkar lyngba ka Kynhun Myntri kala mynjur ia ka jingpynbna paidbah (notification) halor kane ka kam.
“Ngin ym pdiang ia kane ka jingpynbna namar ka long pyrshah ia ka jingthmu jong ka para 5(3) jong ka Sixth Schedule kaba ong baka CrPC bad ka CPC kan ym treikam” ong u Chief Executive Member (CEM) ka KHADC Bah Titosstarwell Chyne haba iakren bad ki nongthoh khubor.
Haba pynpaw ba kane ka jingpynbna kan pyntlot ia ka por jong ki Iingkashari District Council, u Bah Titos ula ong “Ka jingpynbna kala ong shai baka CrPC bad CPC kan treikam ha baroh ki Iingkashari ka Jylla ba kynthup ruh ia ki Iingkashari Disrtrict Council, Kashari Hima (Subordinate Court) bad kashari shnong (Village Court)”.
U Bah Titos ula ong ba ka Sorkar kala iaid shakhmat ha kaban mynjur ia ka jingpynbna khlem da shim ia ki jingai jingmut jong ki District Council ba kynthup ia ka kyntien “Lait noh ki Iingkashari bala thaw hapoh ka Sixth Schedule jong ka Riti Synshar ka Ri India bad ba kine ki Iingkashari kin dang iai bteng ban ioh ia ka bor na ma para 4 bad 5 jong ka Sixth Schedule ka Riti Synshar ka Ri”.
“Ngi la dep ai jingmut ia ka Sorkar halor ka jingdonkam ban pynthikna ba ka bor jong ki Iingkashari District Council ban shong bishar ia ki mutkotduma hapdeng ki paid riewlum ha ki jaka riewlum kim dei ban shah pyntlot noh” ula ong.
“Ta ka daw, ngi pyrshah jur bad rai ban nym pdiang ia kane ka bynta jong ka jingpynbna namar ka khlem pynpaw iaka kyntien “laitnoh” ki Iingkashari bala thaw hapoh ka Sixth Schedule” bynrap u bah Titos.
U CEM ula ong ba ka jingpynbna kumba ka long mynta ka dei kaba lah ban pynman ba kan treikam ruh ha ki Iingkashari jong ki District Council watla ka ong “ba ki Iingkashari District Council kin dang iai bteng ban ioh ia ka bor na ka para 4 bad 5 jong ka Sixth Schedule”.
Haba dawa ia ka Sorkar Jylla ban buhteng shuwa ia kane ka jingpynbna, u CEM ula ong “Ka Sorkar kam pat dei ban pynmih ia ka jingpynbna katba ym pat lah ban pynbeit ia kane ka kam”.
Ula maham ruh da kaba ong “Lada ka Sorkar ka rai ban pyntreikam ia ka rai baka shim ban pyntroin ia ki bor jong ki Iingkashari District Council, kan bha shibun ia ka Sorkar ban khang noh shisyndon ia ki Iingkashari jong ki District Council”.
Haba kylli, u Bah Titos ula ong ba un sa lum ia ka jingialang bad baroh ki MDC ban iashimlang ia kawei ka rai halor kane ka kam. Kane ka jingialang kan sa long ha ka sngi nyngkong ban wan.
“Ngin sa iakynduh ruh ia ki Nongialam na JHADC bad GHADC ban shim rai ia kane ka kam” ula ong.
