Shong kyllain mungor ha Jingkieng bym hun ia kaiphod jingiap u Bah Cherist
Shillong, Nailur 09: Ka Sur ka Bri u Hynniewtrep hynne ka step kila tur paidbah shajan ka Iingdorbar Thaw Ain ka Jylla ha Rilbong bad pynlong ia ka jingiakhih da kaba shong kyllain mungor hakhmat ka khyrdop namar ka jingbym hun ia ka kaiphod jingtohkit ba iadei bad ka jingshah siat iap u Nongialam barim ka HNLC Bah Cheristerfield Thangkhiew.
Kane ka jingiashong kyllain mungor jala jia ha Jingkieng Rilbong hadien ka jingioh khubor ia ki pasoh jong ka kaiphod kaba la wanrah da u Myntri Rangbah ka Jylla Conrad Kongkal Sangma hynne ka sngi ha Iingdorbar, kaba dei ka sngi sdang jong ka Dorbar Synrai.
Ki Nongialam ka Sur ka Bri u Hynniewtrep ha ryngkat ki paidbah kila ialum lymbung ha jingkieng Rilbong bad ioh khubor ka bym pynhun ia ki, kane ka kynhun kala pyrta slogan ba pynrem ia ka Sorkar Jylla.
U Bah Marbud Dkhar secretary ka Sur ka Bri u Hynniewtrep, ula pynpaw ba ka kynhun ka pyrshah jur iaka kaiphod namar kam shim la kdew iaka kyrteng jong ki pulit kiba la donkti ha kaban siat ia u bah Che ne wat iaka kyrteng jongki sakhi satar bad katei ka report ka long ka bym biang haei haei ruh em.
Ula kynnoh ruh ba kane ka kaiphod ka dei kaba la pynkylla ha kaba ong “Ka jingpynslem jong ka Sorkar ban sei madan ia ka kaiphod ka dei ka dak kaba kren shai ia kane”.
Ula ong ka synjuk shen kan shong jingialang ban shim ia ki rai ia kaei kaba kin leh nangne shakhmat halor ka jingbym hun iaka kaiphod jingtohkit khamtam haba ki paidbah kim don jingshaniah shuh ia kane ka sorkar.
