Imphal, Nailur 12 : Ka Sorkar Manipur kala pynmih ia ka hukum ba pyrrkhing ban pyndonkam ia ki sticker ‘Press’ da kaba ong ba ia kine ki sticker lah ban pyndonkam da ki Ladpathai khubor bala dep register bad ki Accredited Journalist.
Ka Sorkar Jylla kala shim ia kane ka sienjam kum ka jingpyrshang ban tehlakam ia ka jingpyndonkam bakla ia ki jacket, ki vest bad sticker ba don ia ka jingthoh Press. Kala pyrrkhing mynta ba ia ka sticker, vest ne jacket ba don jingthoh Press lah ban pyndonakm tang da ki nongthoh khubor kiba don ia ki ID Card bad ki Accreditation Certificate.
Ha kane ka hukum, ka Sorkar Jylla kala ong ba tang ki Press Card lane Accreditation Letter bala ai da ka Directorate of Information and Public Relation (DIPR), Press Bureau of India, All India Radio, Doorbarshan (DD News) bad kiwei ki lad pathai khubor National bad International bala paw, yn shah ban pyndonkam.
Kat kum ka tyllong khubor na ka Sorkar, ka don ka kabu ba lah ban pyndonkam bakla ia kum kine ki jacket, vest bad sticker da ki riew runar ban ioh rung sha ki jaka kiba don jingma ha kaban leh ia ki kam ki ban aiding ia ka jingiakynad.
Ha kajuh ka por, ka All Manipur Working Journalists’ Union (AMWJU) bad Editors’ Guild Manipur (EGM) ha ka sngi U Blei kala kyntu ia kito ki bym dei ki Nongthoh khubor ba kin sangeh ban phong ia ki vest ba don ia ka jingthoh Press lane ban buh ia ki sticker press ha ki kali jong ki.
