Imphal, Nailur 12: Lai ngut ki briew kila shah siat iap ha ki briew bym lah ban ithuh ha Kangpokpi District ha ka sngi sngi Ba-ar.
Kat kum ka khubor, kane ka jingthombor kala jia hapdeng ka shnong Ireng bad Karam Vaiphei, kaba don ha ka thain Kanghui.
Ka jinglong jingman ha kane ka jaka kala shongsyier bha namar kane ka jingwan hia rthma ki briew ki bym lah ban tihuh.
Ha kajuh ka por, ki bor pahara kila leit wut wut sha katei ka jaka bad kila ker kut sawdong ia ka ban pynlong ia ka jingkhynra ia kine ki riewthombor.
“Ngim pat ioh jingtip bha halor kane ka jingjia. Kaei kaba ngi tip ka long ba kane ka jingjia kala jia ha ka por 8:20 mynstep ha kaba ki riew bym lah ban ithuh, kila siat iap ia 3 ngut ki briew hapdeng ka Ireng bad Karam Vaiphei” ong ki Heh Pulit.
Kane ka jingjia kala jia hadien ba mih ka jingiaumsnam ha ka shnong Pallel kaba hap ha Tengnoupal District myn ha ka 8 tarik Nailur, ha kaba 3 ngut ki briew kila iap bad palat 50 ngut kila mynsaw jur.
Ki bor pahara kila pynlong ia ka jingkhynra kaba jur bha mynta ha Kangpokpi Disrict ban behkrad ia ki riew runar bad riew kiengatiar kiba don ha ka thain.
Palat 160 ngut ki briew kila shah pyniap bad bun spah ngut kila mynsaw na ka jingkhie ka thma iapher jaidbynriew ha Manipur, kaba la sdang naduh ka 3 tarik Jymmang hapdeng ki Meitei bad ki Kuki.
