Shillong, Naiwieng 20 : U Myntri Sorkar bad nongialam ka UDP Bah Kyrmen Shylla ha ka sngi Balang, ula pyntip ba kila don bun ngut ki briew kiba la aplai ia ka propecting licence ne mining lease kaba pyni ba bun ki la kot bor ban sdang ia ka jingtih dewiong kat kumka jingstad saian ha ka jaka kaba heh ym duna ia ka 100 hectare.
Kat kum ka jingong jong u, la ka 100 hectare kala biang ne em ha Meghalaya, ia kane yn sa tip tad ynda la don ki nongtih dewiong (kiba la ioh licence) kiba sdang ia jingtih dewiong.
Ha u Naitung mynta u snem, ka Meghalaya State Coordination Committee of Coal Owners, Miners, Exporters, Transporters and Dealers Forum (MSCCCOETDF) kala dawa ia ka Sorkar Jylla ban pyndam noh ia ka Standard Operating Procedure (SOP) ba kynnoh be-ain, ban ai prospecting licence ne mining lease ia u dewiong ha Jylla.
Ka SOP kala pynpaw ba ka jingai prospecting licence lane mining lease ia u dewiong ha Jylla Meghalaya ka dei ban long tang ia ki jaka kiba heh ym duna ia ka 100 hectare.
Haba twad jingmut halor kane ka kam, u Bah Kyrmen ula ong “Ka mat ba kongsan eh jong ka Sorkar ka long ban kitkhia n aka bynta u paidbah, ki kynhun bapher bapher, ki nongtih par bad kino kino kiba don bynta bad kiba donkam ia ka jingkyrshan jong ngi. Ngi don hangne na ka bynta jong ki. Hynrei ia mynta, kiba bun kila aplai ia ka licence ha kane ka kyndon ba 100 hectare, kaba pyni ba bun ki dei kiba kot bor”.
Ha kajuh ka por, u Myntri ula pynpaw ia ka jingsngewskhem ba ka Sorkar hapoh ka jingialam u Myntri Rangbah Conrad K Sangma, kan sa pynthikna shen ia ka jingsdang noh ka jingtih dewiong kat kum ka jingstad saian ha Meghalaya.
