Shillong, Naiwieng 03 : U Symbud Myntri Rangbah ka Jylla Bah Prestone Tynsong, hynne ka sngi palei, ula pyntip ba shen u Myntri kam Pohiing ka Ri Amit Shah, un sa wan iuhkjat ka Jylla bad ka Sorkar Jylla kan sa iakren ia ki ishu ba sahteng jong ka Jylla kynthup ka jingdawa pyntreikam ia ka Inner Line Permit (ILP).
U Symbud Myntri Rangbah ula pyntip ia kane ha ka jingiakynduh bad ka kynhun Sengbhalang ba iakhih ia ka “Save Hynniewtrep Mission”. Kine ki kynhun Sengbhalang ki kynthup ia ka HYC, HANM, JSM bad ka CoRP.
“U DyCM ula pyntip ba u Myntri kam Pohiing ka Ri Amit Shah un sa wan shen sha Shillong bad ka Sorkar kan sa rah iakren ia ki ishu ba dang sahteng bad une u Myntri ka Sorkar Pdeng” iathuh u President ka HYC Bah Robertjune Kharjahrin haba iakren bad ki nongthoh khubor hadien ka jingiakynduh ia u Symbud Myntri Rangbah.
Ki mat jingdawa jong kine ki kynhun Sengbhalang ki kynthup ia ka jingpyntreikam ia ka ILP, ban pynrung ia ka Ktiem Khasi ha ka khyrnit ba phra ka Riti Synshar ka Ri, ban pynkynriah noh ia ka Them Metor na Them Iew Mawlong, ban shong bishar biang ia ka MoU pynbeit pud bala iasoi bad ka Assam nalor ka bhah thungkam thungjam.
Halor ka Them Metor, u Bah Robertjune ula iathuh ba ka kynhun kala ai jingmut ia ka Sorkar halor ka jingpdiang ia ka blueprint jong ka Sorkar da ki Harijan ha kaba ka Sorkar kan ai noh da ka bai wai iing ia ki 342 tylli ki Longiing na Them Metor ba kin ioh sahwai ha kano kano ka jaka lem kumta kin hap ban sah ha ki quarter ka Sorkar hadien bala pyndep.
Halor ka Reservation Policy, kane ka kynhun Sengbhalang kala dawa ia ka Sorkar Jylla ba ka donkam ban pynkylla bad shong bishar biang ia ka Policy. Lad aka Sorkar ka sngew ba kane ka ishu ka dei kaba jyrwit jyrwat bha bad ba kam dei ban ktah, kaei pat ka jingmut pat ban iadonlang ha kajuh ka Jylla hapdeng ki Khasi bad Garo, ai ba ki Garo kin ioh noh la ka jong ka Jylla bad ki Khasi la ka jong ka Jylla.
Halor ka jingiapynbeit pud, u Bah Robertjune ula ong ba dei namar ka jingpynslem jong ka Sorkar Assam ha kaban thaw ia ki Regional Committee, ka jingpynbeit ia u pud u sam ka I kumba kan shimpor bha bad ka bym lah ban pyndep hashuwa jong ka Elekshon.
