Shillong Nailur 21: U Symbud Myntri Rangbah ka Jylla Bah Prestone Tynsong hynne ka sngi Balang ula pyntip ba ka sorkar jylla kan sa phah sha baroh ki 60 ngut ki MLA ka Jylla ia ka kaiphod jingtohkit halor ka jyrsieh na u khaw bala mang sha ka Supplementary Nutrition Program (SNP) ka Tnad Social Welfare bad ka jingkynnoh bamsap ha Meghalaya Energy Corporation Limited.
U Symbud Myntri Rangbah ka Jylla Bah Prestone Tynsong ula iathuh ha ki lad pathai khubor ba ia kane ka rai la shim hadien ba katto katne ki MLA kila wanrah ia ka mat iatai hapoh ka Dorbar Synrai ba dang shu kut jong ka Iingdorbar Thaw Ain ka Jylla.
“(Namar kane), ka Sorkar kala rai ba ia kine ki artylli ki kaiphod ngin sa phah sha baroh ki MLA la ka dei ka kaiphod MeECL lane ka kaiphod jyrsieh na u khaw…ka Tnad Political kan sa leh ia kaba donkam” ula ong.
Ha ka 29 tarik Lber mynta u snem, ka Inquiry Committee ba laitluid bala khlieh da u Justice (Ret) RN Mishra, kala aiti ia ka kaiphod jingtohkit halor ki jingkynnoh treikam bym hok hapoh ka Tnad MeECL. Ia kane la kaiphod la aiti ha u Myntri Rangbah ka Jylla Conrad K Sangma ha New Delhi.
Kumjuh ruh ka Sorkar ha ka 29 tarik Naitung, kala thung ia ka Jingtohkit ba laitluid jong u Justice (Ret) Mool Chand Garg jong ka Meghalaya Pradesh High Court ban tohkit ia ka kam jyrsieh na u khaw.
Kane ka jingtohkit ka dei halor ka jingioh kurup ki Pulit ka Assam ia u Khaw ka Sorkar Jylla kaba la ai sha ka kompani Continental Milkose (India) Ltd na ka bynta ka Supplementary Nutrition Programme (SNP). Ia une u khaw la ioh kurup na kawei ka godown na Boko, Assam.
