Shillong, Risaw 10: U Symbud Myntri Rangbah ba khmih ia ka Tnad Transport Bah Sniawbhalang Dhar ula pyntip ba ia ka tender ban shna pynheh ia ka Shillong Airport lah dep ban khot bad ka jingpyntrei ia ki kam kan sa sdang noh shen.
Kat kum ka jingong jong u, ka jingthied ia ki jaka ki puta kala jan dep artad, bad ka jingpyllait ia ka pisa bai jaka kala sdang sha ki katto katne ki trai jaka.
“Ngi la dep khot ia ka tender, kaba mut ba ki kam kila iaid shakhmat. Ka jingthied jaka ruh kala jan dep. Ki don katto katne kiba la ioh ia ka bai jaka” ula ong haba iakren bad ki nongthoh khubor.
“Ynda lah dep pyllait lut ia ka pisa, ngan sa lah ban pyntip sha phi ia ka jinglut ha ka jingthied jaka” ula bynrap.
U Bah Sniawbha ula pyntip ruh ba ia kane ka project ban pynheh ia ka Kad Liengsuin yn bei tyngka da ka Sorkar Pdeng ym ka Sorkar Jylla.
Ula pynpaw ruh ia ka jingkyrmen ba ka jingpynheh ia ka Kad kan dep noh ha u 2027, ka ban pynlah ia ka jingwan hiar ki liengsuin ba heh ha kane ka kad.
“Ngan pyrshang kat kaba lah ban pyndep ia kane ka kad kham kloi kat kaba lah. Hapoh u 2027, ngi dei ban iohi noh ia ka jingwan hiar ki liengsuin kiba heh” ula ong.
