Itanagar, Jylliew 2: U Myntri Rangbah ka Arunachal Pradesh Pema Khandu ha ka sngi Palei ula pyntip ba ka Sorkar Jylla kala pyntrei mynta haduh 50 tylli ki hydel project barit ha ki jaka khappud bad ka China, kiba iaid hapoh ka border village illuminating programme.
U pyntip ba kine ki project kila treikam mynta bad kila ai bording ia ki shnong ba marjan bad kumjuh ruh ia ki ktem jong ki shipai kiba don ha khappud.
Ula kren ia kane haba iashimbynta ha ka jingrakhe dap 10 snem ka Arunachal Scouts ba long ha Bomdila.
U Khandu ula ong “La kumno kumno ruh shisnem shisnem nga la buh ban leit iuhkjat ha ki border outpost jong ka Constituency jong nga khamtam ja Mago-Chuna sector. Nalor ka jingiakynduh ia ki paidbah hangtei, nga ju leit pynlut por ruh bad ki shipai kiba don ha khappud”
U Khandu ula iaroh ruh ia ki shipai kiba don ha khappud ka Arunachal Pradesh halor ka jingdon ka jingiadei kaba iajan bad ki paid nongshongshnong.
