Shillong, Nailur 15 :U Myntri Rangbah ka Jylla Conrad Kongkal Sangma hynne ka sngi palei, ula ong ba ka Sorkar Jylla kala pyrshang ban shim ia kat ki lad ki lynti ba don ban khang bad pynkut ia ka jingtih bad khaii be-ain ia u dewiong hapoh ka Jylla.
Nalor ki jingai jingpynsajia, ki bor District kila shim ruh ia baroh ki lad ban khang ia ka jingtih be-ain ia u dewiong bad haba ki shem ia kum kine ki kam, ki ju leh tyngeh kat kum ki kyndon ka IPC bad MMDR Act, 1957 pyrshah ia ki nongpynkhein ain.
U Conrad ula pyntip ia kane haba jubab ia ka call attention motion bala wanrah da u MLA ka Mawlai Bah Process T Sawkmie halor ka jingtwa ka par ba dang shen ha West Khasi Hills, kaba lam sha ka jingiap jong uwei u nongtih par.
U Conrad ula ong ba ki bor District kila shim ruh ia ki lynti ban khang ia ki kam tih beain ia u dewiong da kaba pynkhlain ia ka jingiaid pahara nalor ka jingsyntiat da ki drone bala leh da ki Pulit.
U Myntri Rangbah ula pyntip ba ka Tnad Mining & Geology kala ai jingmut ban ai song jingiarap ba T. 5 lak sha ki bahahing u Nongtih par ba khlaw u Lopendro Sangma kaba long kat kum ka jingai jingmut jong ka NGT Committee ia kiba kum kine ki jingjia bad T. 50 hajar sha u Hendid Momin, uba mynsaw.
U Deputy Commissioner ula buh ruh ia u ADC HK Thabah bad L Kharmon EAC ba khmih ia ka Mawshynrut Civil Sub Division ban pynlong ia ka jingtohkit halor kane ka jingtwa ka par.
Ka kaiphod jingtohkit Magistrate kala pynthikna ia kane ka jingtwa ka par ba jia ha ka 19 tarik Nailar. Ka ong ruh ba u trai kane ka par u Hubert R Sangma ula pyntreikam beain ia kane ka par ha ka por ba kane ka jingtwa ka jia.
Ha ka 23 tarik Nailar, u Director ka Mineral Resources, Mining Engineer, Mining Officer ka Tnad Mining & Geology, bala synran da u Bah D Mawlein Inspector of Police ba khmih ia ka Mawshynrut, kila leit jngoh ia kane ka par ba twa ban shim ia ka jingtip halor kane ka par ba twa.
Kane ka jaka ba twa ba par ka dei kaba don sha kyndong bha bad ka bym lah ban poi da ka kali, Ban poi sha kane ka jaka ka Urak, ki Ophisar ki hap ban leit shwa sha ka shnong Riangdin da ki kali saw shaka kaba shim por shikynta sawphew san minit na Shallang sha Raingdim namar ka jingsniew palat ka surok.
Na Riangdim sha Urak pat ki hap ban iaid da ka kjat haduh shikynta shiteng ban poi. U pyntip ba la dep ujor ejahar pyrshah ia u trai ka par ha Shallang Police Station ha kaba ki Pulit kila kem noh ia u Hubert R Sangma uba dei u trai bad ka jingtohkit mynta kala iaid shakhmat.
