Shillong, Nailur 15 :U MLA ka North Shillong sa shisien pat u la pynkhih win biang ha Iing Dorbar hadien ba u la kyrpad ia u Lamphang ba un pyndonkam ia ka “jingsngew” ha kaban ailad ia u ban wanrah ia ka Resolution ka bym shym la don ha ka thup ki mat iakren ha katei ka sngi kaba san jong ka Dorbar Synrai hynne ka sngi Palei.
Ka mat iatai bala thmu wanrah da une u MLA ka North Shillong ka long halor ka Roster System kaba la buh ha ka thup ban iatai ha ka sngi Balang hynrei namar ka jingkut noh ka por, ia kane ka mat ym shym la lah satia ban iatai.
Halor kane, u Lamphang u la kyntu ia u Bah Adelbert ba un kdew halor kano ka Rule ba u kyrpad ban ailad wanrah ia kane ka mat iatai ha kaba na ka liang utei u MLA u la ong,”Lyngba ka jingsngewthuh bad ka jingsngew jongnga.”
U Lamphang u la pyntip ruh ba namar ba ka Business Advisory Committee (BAC) ka la dep ba buh ryntih ia ki thup jong ki mat kat kum ka calendar ha kaba la buh ruh ba ka por kam dei ban tam ia ka 2 baje ha ka jingshong Dorbar.
“Da ka jingsngewthuh ia ka jingdonkam jong ka ishu bad sobjek bad na ka bynta ka jingmyntoi lang baroh, nga la pynjlan ia ka jingshong Dorbar hynrei katkum ka calendar ba la mynjur da ka BAC, ngam lah satia ban iaid lait na kata la ka long kumno kumno ruh,” ula ong.
Hynrei haba utei u MLA u iai ban, na ka liang u Lamphang u la ong ba ia ka Dorbar hap ban pyniaid katkum ki Rules bad ki dkhot ki dei ban sngewthuh ia ka. Kumta, na ka liang u MLA u ong ba katei ka shong ha ka jingstad jong u Lamphang.
Ha katei ka por u Symbud Myntri Rangbah Bah Prestone Tynsong ba dei ruh u Myntri ka tnad Parliamentary Affairs u la ieng bad buh jingkylli ia u MLA haba ia ka thup jong ki mat la dep ban buh lypa na ka bynta katei ka sngi.
U Bah Prestone u la kyntu ruh ia u Lamphang ba un weng noh ia ki jingkren jong utei u MLA na ki jingbuh jingthoh jong ka Iing Dorbar bad ban pyntikna ba kan ym jia shuh hadien habud.
