Shillong, Nohprah 03: Ka Ministry of Home Affairs (MHA) kala pyntip ba ka Sorkar India ka sngewthuh ia ka jingsngew bad ki jingdonkam ban pynrung ia kiwei ki ktien ki thylliej hapoh ka khyrnit ba phra jong ka Riti Synshar ka Ri India.
“Kum ia kine ki jingkyrpad hap ban mynjur haba buh hakhmat ia ki jingsngew bad kiwei kiwei ki jingdonkam ba hap khmih” ong u Deputy Secretary ka MHA (NI) P Venukuttan Nair ha ka shithi sha ka Hynniewtrep Achik National Movement (HANM) ba iadei bad ka jingdawa pynrung ia ka ktien Khasi bad Garo ha ka khyrnit ba phra.
Hynrei, ka MHA kala sngap jar jar halor ka jingdawa ban pyntreikam ia ka Inner Line Permit (ILP).
Ka MHA ka pyntip ba ia mynta, 22 tylli ki ktien kila shah kynthup ha ka khyrnit ba phra jong ka Riti Synshar ka Ri. Kala don ka jingdawa ban pynrung shuh shuh ia bun ki ktien ba kynthup ia ka Khasi bad Garo.
Haba iadei bad ka jingdawa ban thung ia ka Boundary Commission ban pynbeit ia ki jingiakajia khappud hapdeng ka Meghalaya bad Assam, ka MHA kala ong “..hynrei, ka jingkyrpad ban thaw ia ka Boundary Commission ban pynbeit ia ka jingiakajia pud hapdeng ka Meghalaya bad Assam, ka hap hapoh ka jingkhmih jong ka CS Division. Ia kane ka dorkhas yn sap hah sha ka CS Division ba kan leh ia kaba donkam”.
Ka HANM kala ioh pdiang ia ka jubab n aka MHA ha ka 7 tarik Naiwieng, hadien ka jingleit iashong kyllain mungor ha Jantar Mantar, New Delhi, ban pynbor ia ka Sorkar Pdeng ba kan pynsted ha kaban shim rai ia kiba bun ki ishu ba kynthup ia ka ILP.
Haba iakren bad ki nongthoh khubor, u President ka HANM Bah Lamphrang Kharbani ula ong ba ka MHA kam shym la kren eiei halor ka jingdawa ILP ha kane ka shithi jong ka.
“Namar kata,ngi la rai ban bteng ha kaban buddien ia kane ka jingdawa ban ban pynthikna ba ka Sorkar Pdeng kan pyntreikam ia ka ILP ha kaban tehlakam ia ka jingwan rung kyrthep ki bar jylla bad ki mynder ri hapoh ka Jylla” ula ong.
Kat kum ka jingong jong u, ka Meghalaya ka donkam ia ki ain kiba treikam kum ka ILP ban iada ia ka jinglong kyrpang bad ka bha ka miat jong ki trai paid riewlum ka Jylla.
