Shillong, Nohprah 02: Ka Ophis Commissioner Persons with Disabilities ka Sorkar Jylla hynne ka sngi Saitjain, kala pynbna ban pynlong daka Empowerment Fest 2023 haka 4 tarik Nohprah ha U Soso Tham Auditorium Shillong.
Haba pynbna ia kan,e ka Deputy Commissioner for Persons with Disabilities ka Sorkar Jylla Kong Bridget Warshong kala pyntip ba ia kane ka Empowerment Fest 2023 la pynlong kum shi bynta ban rakhe iaka sngi kyrpang jong ki briew ba duna dkhot met.
Ka Kong Bridget kala iathuh ba ka 4 tarik kadei ruh ka sngi ban pynkut iaka jingrakhe ‘International Day of Persons with Disabilities 2023’ lane ka sngi kyrpang ki briew ba duna dkhot.
Kala iathuh ba ha kane ka Empowerment Fest 2023, kin don shibun ki jait jingpynbyrngiaia hynrei kaba kongsan kadei ban pynsngewthuh paidbah iaka hok bad iaka bha ka miat ki briew kiba duna dkhot met.
“Ka phang pdeng ha ka sngi rakhe iaka sngi kyrpang ki briew ba duna dkhot met kan dei ‘A Day For All’ namar haka ain ruh la kren shai ban kynthup lang iaki bieiw ba duna dkhot met haka imlang sahlang” ong ka Kong Bridget.
Ka Kong Bridget kala iathuh ba man u snem ka Meghalaya bad ka pyrthei baroh kawei haka 3 tarik u Nohprah ka ju rakhe iaka sngi kyrpang ki briew ba duna dkhot met lane ka ‘International Day of Persons with Disabilities’.
Kala iathuh ba ka thong jong kane ka sngi kadei ban pynshai bad ban kyntiew iaka hok ki ba duna dkhot met katkum ka ain Right of Persons with Disabilities Act 2016 kaba la kdew shai ba ki briew ba duna dkhot met ruh ki don iaka hok ban im kumjuh haka imlang sahlang.
Nalor ka jingpynshai paidbah halor ka hok ki briew ba duna dkhot met, ha kane ka sngi kin don ruh ki jait prokram ban pynsah kynmaw iaki paidbah ha kum kane ka sngi ba rakhe iaka sngi kyrpang kiba duna dkhot met.
