Shillong, K’Lyngkot 19: U President ka Bharatiya Janata Party (BJP) Meghalaya u bah Ernest Mawrie ula pyntip ba shen ka Sorkar Pdeng kan sa pyntreikam biang ban ai subsidy ia ki nongrep ba kin theid sboh dawai rep.
“Ha u bnai Naiwieng 2022, ka sorkar pdeng kala lum ia baroh ki karkhana ba shna dawai sboh mar rep namar ka sorkar kan bteng biang ia ka jingai subsidy ia ki nongrep hapoh ka ri India baroh kawei” la ong u bah Ernest.
U bah Ernest ula ong ba haduh mynta iaka Meghalaya ym pat pynbna ba kadei ka jylla ba rep khlem dawai ne “Organic Farming’ bad ki dang don bun ki nongrep hapoh ka jylla kiba la dawa jingiarap naka sorkar haba iadei bad ki sboh dawai mar rep.
“Kane ka jingdawa sboh dawai mar rep kam dei tang napoh Meghalaya hynrei kala wan na baroh kawei ka ri India bad dei namar kane u Myntri Rangbahduh ka ri ula shim khia ban khot daka jingialang ka kynhun myntri sorkar pdeng ban shim rai ha ka ban iarap pynioh sboh dawai iaki nongrep jong ka ri” ula ong.
U bah Ernest ula ong ba u sngewsih ban iohi ba ka sorkar jylla kala pynsahkut iaka jingthep kyrteng ki nongrep ka jylla ban ioh jingiarap bad naka liang ka BJP ruh la bunsien kala kyntu iaka sorkar ban pyllait pisa jingiarap iaki nongrep bad naka liang ka Party kala iakren ruh bad u Myntri ka rep ka riang.
