Shillong, Nailar 07 : Ki nongialam ka National People’s Party ki la pynbna ba arngut ki MLA ba kynthup ia u Bah Hamlet Dohling MLA ka PDF na Mylliem bad kumjuh u Bah Kimfa S Marbaniang MLA ba shah sospon ka Congress na Rambrai, kin sa aireng na ka NPP ha ka elekshon MLA kaban long ha u snem.
“Baroh nga ngeit phi kwah lut ban tip mano ban aireng na ka NPP ha Mylliem ha ka elekshon MLA kaban sa wan. Watla ka por kam pat dei hynrei ngan iathuh ba u MLA jong phi hi Bah Hamlet Dohling un dei u kyrtong jong ka party, ” Pynbna u Bah Bajop Pyngrope ba dei u MDC ka Rambrai bad Nongaiktien ka NPYF ha ka jingialang jong ka NPP kaba long mynsngi Saitjain ha Mylliem.
U la iathuh ruh ba ka NPP ka la tikna ruh ba u MLA ka Rambrai ba shah sospon ha ka Congress Bah Kimfa S Marbaniang un sa aireng lang naka NPP ha ka elekshon ban wan.
Ha katei ka sngi, ka NPP ka la pdiang burom ia ki nongialam na ki party bapher bapher khamtam na ka PDF, Congress bad kiwei kiwei kiba la wan ban tyrwa iatreilang bad ka party na ka bynta ka elekshon MLA kaban long ha u 2023.
Ia kitei ki nongkitkam ba thymmai jong ka NPP Mylliem la pynskhem da u Bah Macmillan Byrsat MLA ka NPP na Nongstoin.
Utei u nongmihkhmat u la iathuh ruh ba ha ka jingshisha kim pat kwah ban pynbna paidbah ia ka kyrteng hynrei jait ba ka la mih, kumta u kwah ban pyntip ba u Bah Hamlet un iakhun na ka tiket NPP.
Kiwei pat ki heh NPP kiba donlang ki kynthup naduh u bah Don War Working President ka NPP, Bah Aibor Tynsong General secretary ka NPP East Khasi Hills nalor kiwei kiwei.
