Shillong, Nailur 15 : U Myntri Rangbah ka Jylla Conrad Kongkal Sangma hynne ka sngi Palei, ula pynthikna ba ka Sorkar Jylla kala dep rai ba kan ym pyniaid shuh shakhmat haba iadei bad ka jingtyrwa ban plie ia ki Casino ha Jylla.
U Myntri Rangbah ula pynshai ruh ba ka jingai ia ki lisen ba shipor ka dei kaba la dep jia hashuwa ba kan don ka jingiakynduh hapdeng ka Sorkar bad ki Nongialam Niam lem kumjuh ruh ki kynhun Sengbhalang bad kiwei kiwei.
“Nga la dep kren da kaba shai kdar ba ngi la dep bthah ban pynsangeh ia ka jingthmu plie ia ki casino” ong u Conrad halor ka jingiai mih ki jingpyrshah na ki kynhun bapher bapher kynthup ki seng sain pyrthei, ki Sengbhalang, Seng Niam bad kiwei kiwei.
“Hynrei ki kam kiba la iaid shakhmat (jingai lisen ba shipor) ki dei kiba la jia hashuwa ban pynmih ia katei ka hukum. Kitei ki kam kila don hynrei ka rai kaba la shim bad kaei kaba ngi la pyntip sha baroh, ka long ba ngin ym pyniaid shuh shakhmat” ula bynrap.
U Myntri ka Tnad lum Khajna ka Jylla James K Sangma ula pyntip ha Iingdorbar Thaw Ain ba ka Jylla kala dep ban ai haduh lai tylli ki lisen ba shipor ne ki Provisional Licence ban plie ia ki casino hapoh Ri-Bhoi District.
“Kane ka dei kaba la jia hashuwa ban don ka jingiakynduh ia ki Nongialam Niam bad ki Sengbhalang. Kine ki Provisional Licence ki don ia ki kyndon kata ba dei ban sdang ia ka kam hapoh 6 ne 8 bnai hynrei namar ngi la rai ban pynsangeh noh, kumta kine ki Licence kin ym don jingmut shuh” ong u Myntri Rangbah.
Haba pynshai ba u (CM) bad ka Sorkar Jylla ki khlem ialam bakla iano iano ruh, u Conrad ula ong “Kine ki lisen kin sa iap noh hadien katto katne por bad ngi la dep ban kren da kaba shai ia kane”.
Halor ka jingkylli la ka sorkar ka don jingthmu ban pynduh noh ia ka aiñ khalai, u Myntri Rangbah ula ong, ka sorkar kam don jingthmu ban pynduh noh ia kane ka aiñ hynrei ka don iaka jingsngewkhia pat ha kaba iadei bad ki Online Gaming bad Jackpot Parlour namar ba la bun snem kam shim la don kano kano ka jingpyrkhing ia ki mynta la 25 snem tam.
“Ka long kaba donkam ban don ia ki kyndon aiñ kaban pyrkhing ia ka rukom treikam jong ki jingialehkai khalai la kidei ki Online ne Offline” ula ong.
“Ngi la rai ba lada ngin iaid shakhmat, ngin don shwa nyngkong iaka jingiakren kaba sani bha, hynrei ka ain kala don lypa bad la dep ruh ban thaw ia ki Rules, hynrei kumba long mynta hi, ngin ym iaid shakhmat. Ngin leh tang ynda ngi la dep ban iatai sani, iasyllok bad iakynduh bad kiba bun” la pynkut u Conrad.
